২০১৯ বৰ্ষৰ এছিয়ান ফুটবল কনফেডাৰেশ্যন (এ এফ চি) প্লেয়াৰ অৱ দা ইয়েৰ (মহিলা) এৱাৰ্ডৰ বাবে মনোনীত হৈছে ভাৰতীয় দলৰ অধিনায়ক তথা অভিজ্ঞ ফুটবলাৰ লইটংবাম আশালতা দেবী।
মণিপুৰৰ এইগৰাকী চেণ্ট্ৰেল ডিফেণ্ডাৰৰ উজ্জীৱিত প্ৰদৰ্শনৰ বলতেই ভাৰতে ২০২০ অলিম্পিক কোৱালিফায়াৰ্ছৰ দ্বিতীয় ৰাউণ্ডত প্ৰৱেশ কৰিছিল।
ইয়াৰ উপৰি ২০১৯ ছাউথ এছিয়ান ফুটবল ফেডাৰেশ্যন টুৰ্ণামেণ্টৰ খিতাপ দখল কৰাতো তেওঁৰ যথেষ্ট অৰিহনা আছে।
এছিয়ান ফুটবলৰ আটাইতকৈ সন্মানীয় বঁটাটিৰ বাবে আশালতা দেবীৰ লগতে চীনৰ লি য়িং আৰু জাপানৰ চাকি কুমাগাইও মনোনীত হৈছে।
ভাৰতৰ মহিলা ফুটবলৰ উত্তৰণৰ ক্ষেত্ৰত যথেষ্ট অৱদান আগবঢ়োৱা দেৱীয়ে ২০১৮-১৯ বৰ্ষৰ ইণ্ডিয়ান উইমেনছ প্লেয়াৰ অৱ দা ইয়েৰ বঁটাও লাভ কৰিছে।
ইণ্ডিয়ান উইমেনছ লীগত চেঠু এফ চিৰ হৈ খেলি খিতাপ অৰ্জন কৰা দেৱীয়ে হ’ল দ্বিতীয়গৰাকী ভাৰতীয় যিয়ে বিদেশী ক্লাবৰ হৈ খেলাৰ অভিজ্ঞতাৰে পৰিপুষ্ট।
তেওঁ ২০১৫ বৰ্ষত মালদ্বীপৰ মহিলা ক্লাব নিউ ৰেডিয়েণ্টৰ হৈ খেলিছিল।
