দিল্লীৰ উপ মুখ্যমন্ত্ৰী মনীষ ছিছ’দিয়া আৰু মন্ত্ৰী সৈত্যেন্দ্ৰ জৈনে পদত্যাগ কৰিছে। দুয়োজনে দিল্লীৰ মুখ্যমন্ত্ৰী অৰবিন্দ কেজৰিৱাললৈ পদত্যাগ প্ৰেৰণ কৰিছে আৰু কেজৰিৱালে এই পত্ৰ গ্ৰহণ কৰিছে। খবৰ অনুসৰি এই দুগৰাকী নেতাৰ ঠাইত অৰবিন্দ কেজৰিৱালৰ মন্ত্ৰীসভাত দুজন নতুন মন্ত্ৰীক নিযুক্তি দিব।
এই খবৰ বিয়পি পৰাৰ পাছতে বিজেপিয়ে দিল্লীৰ মুখ্যমন্ত্ৰী অৰবিন্দ কেজৰিৱালক কটাক্ষ কৰিছে। মনীষ ছিছ’দিয়া আৰু সৈত্যেন্দৰ জৈনৰ পদত্যাগৰ প্ৰতিক্ৰিয়া প্ৰকাশ কৰি বিজেপি নেতা অমিত মালব্যই কয় যে দিল্লীৰ মুখ্যমন্ত্ৰী অৰবিন্দ কেজৰিৱালও পদত্যাগৰ বাবে সাজু হোৱা উচিত। ইফালে বিজেপিৰ সাংসদ প্ৰৱেশ ভাৰ্মাই টুইট কৰি কয় যে দুৰ্নীতিৰ বিৰুদ্ধে যুঁজত আজি দিল্লীৰ জনসাধাৰণে জয়লাভ কৰিছে। অৰবিন্দ কেজৰিৱালেও আগন্তুক সময়ত পদত্যাগ পত্ৰ সাজু কৰি ৰাখিব লাগে। আপৰ সকলো দুৰ্নীতিগ্ৰস্ত লোকে নিজৰ পাপৰ শাস্তি লাভ কৰিব লাগিব।
ইয়াৰ পূৰ্বে সংবাদ সংস্থা এএনআইয়ে প্ৰকাশ কৰিছে যে অৰবিন্দ কেজৰিৱালৰ চৰকাৰত কোনো নতুন মন্ত্ৰীয়ে শপত গ্ৰহণ নকৰে। সূত্ৰই দাবী কৰিছে যে মনীষ ছিছ’দিয়াৰ বিভাগসমূহ পৰিবহণ মন্ত্ৰী কৈলাশ গেহলট আৰু ৰাজকুমাৰ আনন্দক ভগাই দিয়া হ’ব। অৱশ্যে পিছত আম আদমি পাৰ্টিয়ে দুজন নতুন মন্ত্ৰী নিযুক্তি দিব বুলিও কোৱা হৈছে।
উল্লেখ্য, আম আদমী পাৰ্টিৰ এই দুয়োজন নেতাই এতিয়া কাৰাগাৰত বন্দী। কেজৰিৱালৰ অতি ঘণিষ্ঠ সৈত্যেন্দ্ৰ জৈন দীৰ্ঘদিন ধৰি তিহাৰ কাৰাগাৰত আবদ্ধ হৈ আছে। ইফালে দিল্লীৰ উপ মুখ্যমন্ত্ৰী মনীষ ছিছ’দিয়াক চিবিআইয়ে দুদিন পূৰ্বে গ্ৰেপ্তাৰ কৰিছিল।
নতুন সুৰা নীতিৰ দুৰ্নীতিৰ অভিযোগত গ্ৰেপ্তাৰ কৰা হৈছে মনীষ ছিছ’দিয়াক। মঙলবাৰে তেওঁ উচ্চতম ন্যায়ালয়তো মুখথেকেচা খাইছে। জামিনৰ বাবে উচ্চতম ন্যায়ালয়ে তেওঁক উচ্চ ন্যায়ালয়ৰ কাষ চাপিবলৈ নিৰ্দেশ দিছে। দিল্লীৰ আদালতে ৫ দিনৰ বাবে চিবিআইৰ জিম্মালৈ প্ৰেৰণ কৰিছে মনীষ ছিছ’দিয়াক।
