যি সময়ত কংগ্ৰেছ এৰি বিজেপিলৈ নেতাৰ সোঁত বৈছে তেনে সময়তে শুক্ৰবাৰে ৰাজীৱ ভৱনত বিপৰীত ছবি দেখিবলৈ পোৱা গ’ল।
আজি গুৱাহাটীৰ ৰাজীৱ ভৱনত কংগ্ৰেছ কৰ্মী সকলৰ মাজত উৎসাহ আৰু উদ্দীপনা বৃদ্ধি তথা সমাগত গুৱাহাটী পৌৰ নিগমৰ নিৰ্বাচনৰ প্ৰস্তুতি সম্পৰ্কে আলোচনা কৰিবলৈ গুৱাহাটী মহানগৰী জিলা কংগ্ৰেছৰ এখন উদ্দীপনা সভা অনুষ্ঠিত হয় |
উক্ত সভাতে নিৰ্বাচনৰ প্ৰাক্ ক্ষণত বিজেপিয়ে দিয়া মিথ্যা প্ৰতিশ্ৰুতি বিশেষকৈ মাইক্ৰ’ ফাইনেন্সৰ ঋণ ৰেহাই সন্দৰ্ভত নিৰ্বাচনৰ অন্তত বিজেপিয়ে মৰা ওলোটা খৰকে ধৰি নানানটা বিষয়ত অসন্তুষ্ট হৈ বিজেপিৰ নিৰ্বাচিত প্ৰাক্তন জিলা পৰিষদৰ সদস্য দ্বীপক কলিতা, কামৰূপ জিলা কিষাণ মৰ্চাৰ প্ৰাক্তন সম্পাদিকা প্ৰতিভা নাথ, আৰু বিজেপি সদস্য ক্ৰমে অভিজিৎ বায়ন, লক্ষ্যধৰ মহন্ত, যদু ঠাকুৰীয়াই কংগ্ৰেছ দলত যোগদান কৰে ।
কʼভিদ অতিমাৰীৰ ফলত বহুদিনৰ মূৰত পুনৰ একেলগ হোৱা কাৰ্যই কংগ্ৰেছ কৰ্মীসকলৰ মাজত ব্যাপক উৎসাহ পৰিলক্ষিত হোৱা বুলি দাবী কৰে ৰিপুন বৰাই |
কৰ্মী সকলক সম্বোধি দিয়া ভাষণত ৰিপুন বৰাই কয় “ধনে-জনে শক্তিশালী, মিথ্যা প্ৰচাৰ সৰ্বস্ব তথা ব্যাপক হিতাধিকাৰী সৃষ্টিৰে জাতিটোক অকামিলা কৰিবলৈ প্ৰস্তুত হোৱা বিজেপি দলৰ লগত মাত্ৰ .৮৯ শতাংশ ভোটত পিছ পৰা কাৰ্যত উৎসাহ নেহেৰুৱাবলৈ কৰ্মী সকলক আহ্বান জনাইছো।
তেওঁ লগতে উল্লেখ কৰি কয় যে বহু সময়ত বহু দ্বিগজ নেতা বিশেষকৈ প্ৰয়াত মোৰাৰজী দেশাই, ভিপি সিং, পি এ চাংমা, শাৰদ পাৱাৰৰ দৰে নেতায়ো কংগ্ৰেছ এৰি গৈছিল | তথাপিও কংগ্ৰেছ দল বটবৃক্ষৰ দৰে আজিও থিয় হৈ আছে বুলি দাবী কৰে ৰিপুন বৰাই।
ইয়াৰোপৰি সমাগত গুৱাহাটী পৌৰ নিগমৰ নিৰ্বাচনত অংশগ্ৰহণ কৰা
সম্পৰ্কেও আজিৰ সভাত বিস্তৰ ভাবে আলোচনা হয় আৰু এই নিৰ্বাচনত উন্নত ফল দেখুৱাবলৈ সকলোৱেই প্ৰতিশ্ৰুতিৱদ্ধ হয় |
