কাগজে-কলমে মেচখন হ’লেও এইখনৰ কোনো গুৰুত্ব নাছিল। মেচখন পূৰ্ব নিৰ্ধাৰিত হোৱাৰ বাবে খেলত নামিছিল গুজৰাট টাইটানছ আৰু লক্ষ্ণৌ ছুপাৰ জায়েন্টছ। ইতিমধ্যে গুজৰাটে প্লে অফত প্ৰৱেশ কৰাৰ বিপৰীতে লক্ষ্ণৌ বাহিৰ হৈছিল। এই মেচখনত লক্ষ্ণৌ ছুপাৰ জায়েন্টছে ৩৩ ৰানত জয়লাভ কৰে। যদিও পইণ্ট তালিকাৰ স্থান সলনি খেলখনৰ ফলাফলৰ ওপৰত নিৰ্ভৰশীল নাছিল, তথাপিও এল এছ জিয়ে মেচখনত জয়লাভ কৰি সান্ত্বনা লভিছে।
এটা দল তেতিয়াহে সফল হয় যেতিয়া সেই দলটোৰ প্ৰতিটো বিভাগৰ খেলুৱৈ সফল হয়। সেইটো এইবাৰ লক্ষ্ণৌ ছুপাৰ জায়েন্টছৰ ক্ষেত্ৰত দেখা নগ’ল। যদিও দলটোত মিচেল মাৰ্শ্ব, নিকোলাছ পুৰাণ, ঋষভ পণ্টৰ দৰে খেলুৱৈ আছিল, তথাপিও কোনেও দক্ষতা অনুসৰি খেলিব পৰা নাছিল।
শেষ মুহূৰ্তত তেওঁলোকে নিজৰ ছন্দ বিচাৰি পালে। আই পি এলৰ পৰা বাহিৰ হোৱাৰ পিছত এল এছ জিৰ খেলুৱৈসকলে উজলি উঠি শক্তিশালী গুজৰাট টাইটানছক পৰাস্ত কৰে।
এক গুৰুত্বহীন মেচত লক্ষ্ণৌৱে আধিপত্য প্ৰদৰ্শন কৰে। প্ৰথমে বেটিং কৰি তেওঁলোকে ২৩৫ ৰানৰ বিশাল স্ক’ৰ কৰে। মাত্ৰ ২ টা উইকেট হেৰুৱাই এই ৰান কৰে। আইডেন মাৰ্ক্ৰাম আৰু মিচেল মাৰ্শ্বৰ অপেনিং পাৰ্টনাৰশ্বিপত ৯১ ৰান সংগ্ৰহ কৰে।
মাৰ্কৰামে ৩৬ ৰান সংগ্ৰহ কৰি উভতি যোৱাৰ পিছত নিকোলাছ পুৰাণ আৰু মিচেল মাৰ্শ্বে দলটোৰ দায়িত্ব লয়। এই যুটিয়ে ১২১ ৰান সংগ্ৰহ কৰে। মাৰ্ছে ১১৭ ৰানত উভতি যায় যদিও তেতিয়ালৈকে দলটোৱে বিশাল স্ক’ৰৰ পথত আগবাঢ়িছিল। আই পি এলত মাৰ্শ্বৰ এইটো প্ৰথম শতক আছিল।
নিকোলাছ পুৰানে ৫৬ ৰান সংগ্ৰহ কৰে। বহুদিনৰ মূৰত তেওঁ আই পি এলত অৰ্ধশতক অৰ্জন কৰে। কোনো গুৰুত্ব নথকা মেচত জিলিকি উঠিল এই দুগৰাকী তাৰকা। এই খেলখনত ঋষভ পন্তে ১৬ ৰান সংগ্ৰহ কৰে।
বিশাল স্কোৰৰ লক্ষ্য অনুসৰণ কৰি গুজৰাট টাইটানছৰ কোনো এজনেই ডাঙৰ স্কোৰ নকৰিলেও প্ৰতিজন বেটছমেনে ৰান পাইছিল। ছাই সুদৰ্শন, শুভমন গিল, জোছ বাটলাৰ, শ্বাৰফান ৰাদাৰফোৰ্ডে ক্ৰমে ২১, ৩৫, ৩৩, ৩৮ ৰান সংগ্ৰহ কৰে।
শেষত শ্বাহৰুখ খানে কঠোৰ যুঁজ দিলেও তেওঁ নিজৰ দলটোক জয়ৰ দিশত আগুৱাই নিব নোৱাৰিলে। শ্বাহৰুখে ৫৭ ৰান সংগ্ৰহ কৰে। অৱশ্যে লক্ষ্ণৌৰ বলাৰৰ শক্তিৰ সন্মুখত গুজৰাটৰ কোনো বেটছমেনে টিকিব নোৱাৰিলে। নিৰ্ধাৰিত ২০ অভাৰত গুজৰাটে ৯টা উইকেট হেৰুৱাই ২০২ ৰানহে সংগ্ৰহ কৰে।
লক্ষ্ণৌৰ হৈ উইলিয়াম অ’ৰ’ৰ্কে তিনিটা উইকেট দখল কৰে। আৱেশ খান আৰু আয়ুষ বদোনীয়ে দুটাকৈ উইকেট দখল কৰে। আকাশ মহাৰাজ সিং আৰু শ্বাহবাজ আহমেদে এটাকৈ উইকেট পায়।
