নাগৰিকত্ব সংশোধনী বিধয়েকৰ বিৰুদ্ধে ৰাজ্যৰ সকলো প্ৰান্ততে প্ৰতিবাদ সাব্যস্ত হৈ থকাৰ পাছতো বিধেয়কখন সন্দৰ্ভত বিজেপি চৰকাৰে গ্ৰহণ কৰা স্থিতিৰ বিৰুদ্ধে প্ৰতিবাদ জনাই ৪ ফেব্ৰুৱাৰি অৰ্থাৎ সোমবাৰে গোলাঘাট জিলাৰ সাতটা চহিদ পৰিয়ালে জিলা উপায়ুক্তক ৰাজ্য চৰকাৰে প্ৰদান কৰা চহিদ স্মাৰক ঘূৰাই দিয়ে।
ইতিপূৰ্বে বিশ্বনাথ আৰু গুৱাহাটীত একাংশ চহিদ পৰিয়ালে চৰকাৰক স্মাৰক ঘূৰাই দি বিধেয়কখনৰ বিৰোধিতা কৰাৰ পিছত সোমবাৰে গোলাঘাট জিলাৰ চহিদ পৰিয়ালকেইটাই লোৱা প্ৰতিবাদী পদক্ষেপে সকলোৰে দৃষ্টি আকৰ্ষণ কৰে।
নাগৰিকত্ব সংশোধনী বিধেয়কৰ বিৰোধিতা কৰি চৰকাৰী সন্মান ঘূৰাই দিয়া উক্ত চহিদ পৰিয়ালকেইটা হ’ল ক্ৰমে চহিদ চন্দনজ্যোতি ভূঞা, চহিদ দেবেশ্বৰ বৰা, চহিদ অনিল বৰা, চহিদ তপনজ্যোতি কলিতা, চহিদ দিলীপ চুতীয়া, চহিদ ভোগেশ্বৰ ফুকন, চহিদ ঘণকান্ত শইকীয়াৰ পৰিয়ালবৰ্গ।
তেওঁলোকে গোলাঘাট জিলা ছাত্ৰ সন্থাৰ কাৰ্যালয় চহিদ ভৱনৰ পৰা উপায়ুক্ত কাৰ্যালয়লৈ সমদল কৰি গৈ নিজ নিজ পৰিয়ালৰ স্মাৰক উপায়ুক্তৰ হাতত চমজাই দিয়ে।
