কোকৰাঝাৰ পশ্চিম সমষ্টিৰ পূৱ গৈঙীয়া নৈৰ গৰাখহনীয়াৰ কৱলত পৰা বামূনীগাওঁ অঞ্চল পৰিদৰ্শন
কোকৰাঝাৰ জিলাৰ গোসাঁইগাওঁ উন্নয়ন খণ্ডৰ অন্তৰ্গত পূৱ বামুনীগাঁও আৰু বামুনীগাওঁ অঞ্চল গৈঙীয়া নৈৰ গৰাখহনীয়াই সংহাৰৰ সৃষ্টি কৰা পৰিলক্ষিত হৈছে।
নৈ খনৰ গৰাখহনীয়াই কেইবা বছৰ ধৰি বামুনীগাওঁ অঞ্চলৰ প্ৰায় এহেজাৰ বিঘা খেতি মাটি আৰু বহুতো পৰিয়ালৰ ঘৰ বাৰী ভেটি মাটি নৈৰ বুকুত জাহ গৈছে।
বহতো পৰিয়ালে নৈ খনৰ গৰাখহনীয়াত সৰ্বস্ব হেৰুৱাই বামুনীগাওঁ এৰি বেলেগ ঠাইত আশ্ৰয় লব লগা হৈছে।
বামুনীগাওঁ খন কোকৰাঝাৰ পশ্চিম সমষ্টিৰ বৃহত্তৰ গাঁও আছিল যদিও কেইবা বছৰ ধৰি গৈঙীয়া নৈ ৰ গৰাখহনীয়াত উছন হৈ পৰিছে।
বৰ্তমান প্ৰায় ৭০/৮০ টা পৰিয়াল গৈঙীয়া নৈৰ গৰাখহনীয়াত জাহ যোৱাৰ উপক্ৰম হৈছে।
নৈ খনৰ এনে দৃশ্য দেখি স্থানীয় সমাজ সেৱক মাইনূদ্দিন মণ্ডলে গোসাঁইগাওঁ মহকুমাধিপতি পল্লবী সৰকাৰক অৱগত কৰে।
পাছত মহকুমাধিপতি পল্লবী সৰকাৰে গৈঙীয়া নৈৰ গৰাখহনীয়া হোৱা বামুনীগাঁও অঞ্চল পৰিদৰ্শন কৰে আৰু গৰাখহনীয়াৰ ক্ষয়ক্ষতিৰ বুজ লয়।
অনতিপলমে নৈ খনৰ গৰাখহনীয়া প্ৰতিৰোধৰ বাবে উপযুক্ত ব্যৱস্থা গ্ৰহণৰ বাবে বিভাগীয় কৰ্তৃপক্ষক নিৰ্দেশ দিয়ে মহকুমাধিপতি গৰাকীয়ে।
মহকুমাধিপতি পল্লবী সৰকাৰৰ নিৰ্দেশ মৰ্মে অৰূপ ভট্টাচাৰ্য আদিয়ে বামুনীগাঁও গৰাখহনীয়া অঞ্চল পৰ্যবেক্ষণ কৰে আৰু ইয়াৰ প্ৰতিবেদন উৰ্দ্ধতম কৰ্তৃপক্ষলৈ প্ৰেৰণ কৰিব বুলি ৰাইজক আস্থা প্ৰদান কৰে আৰু গোসাঁইগাঁও
উন্নয়ন খণ্ডৰ তৰফৰ পৰা অচিৰেই গৰাখহনীয়া প্ৰতিৰোধৰ ব্যৱস্থা গ্ৰহণ কৰা হব বুলি জানিবলৈ দিয়ে।
এইক্ষেত্ৰত বিভাগীয় কৰ্তৃপক্ষই কি পদক্ষেপ গ্ৰহণ কৰে সেয়া পৰৱৰ্তী সময়ত লক্ষ্যণীয় হ’ব।
