সোমবাৰে পুৱা তিনিচুকীয়া জিলাৰ ডিগবৈ সংমণ্ডলৰ জাগুন বনাঞ্চলৰ অন্তৰ্গত কথা গাঁৱত উদ্ধাৰ হয় এটা পূৰ্ণবয়স্ক বন্যহস্তীৰ মৃতদেহ।
জানিব পৰা মতে হাতীটোৰ বয়স প্ৰায় ৪০ বছৰ। এই হাতীটোৰ মৃত্যুত এতিয়া স্থানীয় ৰাইজৰ মাজত চাঞ্চল্যৰ সৃষ্টি হৈছে।
বন বিষয়া প্ৰমোদ ফুকনে জনোৱা মতে হাতীটোৰ শৰীৰত এটা সংক্ৰমিত টিউমাৰ লক্ষ্য কৰা হৈছে। উক্ত ঘাঁৰ পৰা তেজ আৰু পুঁজ ওলাই থকা বুলি জানিব পৰা গৈছে। অনুমান কৰা হৈছে যে অসুস্থতাৰ বাবেই হাতীটো জনাঞ্চলৰ ফালে ওলাই আহিছিল।
অৱশ্যে হাতীটোৰ মৃত্যুৰ সঠিক কাৰণ নিৰ্ণয় কৰিবলৈ মৰণোত্তৰ পৰীক্ষা কৰা হৈছে।
উল্লেখ্য যে যোৱা ৩২ দিনৰ ভিতৰত ডিগবৈ অঞ্চলত ৰহস্যজনকভাবে ৩ টাকৈ বন্যহস্তীৰ মৃত্যু হৈছে। যোৱা
দেওবাৰেও ডিগবৈৰ পানীবাৰীৰ এখন চাহ বাগিছাত ৰহস্যজনকভাবে উদ্ধাৰ হৈছিল এটা হাতী পোৱালীৰ মৃতদেহ। হাতী পোৱালীটোৰ বয়স ৮ বছৰ বুলি জানিব পৰা গৈছে। স্থানীয় বাসিন্দা বিনোদ মুণ্ডাৰ মালিকানাধীন বাগিচাখনৰ ভিতৰতে প্ৰাণহীন অৱস্থাত উদ্ধাৰ হৈছে প্ৰায় ৮ বছৰ বয়সৰ হাতীটো। কিন্তু পশু চিকিৎসকসকলে মৃত্যুৰ সঠিক কাৰণ নিৰ্ণয় কৰিব পৰা নাই।
