প্ৰাক্তন জিলা আৰু সত্ৰ ন্যায়াধীশ তথা দুৰ্নীতি নিয়ন্ত্ৰণ আয়োগৰ প্ৰাক্তন আয়ুক্ত মহম্মদ চাহাবুদ্দিন চুপ্পুক বাংলাদেশৰ ৰাষ্ট্ৰপতি পদৰ বাবে মনোনীত কৰা হৈছে। দেশখনৰ ৰাষ্ট্ৰপতি নিৰ্বাচনত শাসনাধীষ্ঠ আৱামী লীগৰ প্ৰাৰ্থী হিচাপে তেওঁক মনোনীত কৰা হৈছে।
আৱামী লীগৰ সাধাৰণ সম্পাদক ওবাইডুল কাদেৰে দেওবাৰে নিৰ্বাচন আয়োগৰ ওচৰত দলৰ প্ৰাৰ্থী হিচাপে চাহাবুদ্দিন চুপ্পুৰ নাম দাখিল কৰে।
আৱামী লীগৰ সংসদত যিহেতু নিৰংকুশ সংখ্যাগৰিষ্ঠতা আছে, গতিকে তেওঁলোকৰ মনোনীত প্ৰাৰ্থীয়েই যে পৰৱৰ্তী ৰাষ্ট্ৰপতি হ’ব ই নিশ্চিত। বিৰোধী দল জাতীয় পাৰ্টিয়ে ইতিমধ্যে তেওঁলোকে প্ৰাৰ্থী প্ৰদান নকৰাৰ কথা ঘোষণা কৰিছে।
ৰাষ্ট্ৰপতি পদৰ প্ৰাৰ্থীৰ মনোনয়ন পত্ৰসমূহ ১৩ ফেব্ৰুৱাৰীত পৰীক্ষা কৰা হ’ব। ১৪ ফেব্ৰুৱাৰীত প্ৰত্যাহাৰৰ অন্তিম দিন। ভোটগ্ৰহণ ১৯ ফেব্ৰুৱাৰীৰ আবেলি ২:০০ বজাৰ পৰা সন্ধিয়া ৫:০০ বজালৈ অনুষ্ঠিত হ’ব। অৱশ্যে, যদিহে ৰাষ্ট্ৰপতি পদৰ বাবে এজনেই প্ৰাৰ্থী থাকে, তেন্তে ভোটৰ প্ৰয়োজন নহ’ব। তেনে ক্ষেত্ৰত প্ৰাৰ্থীজনক ১৪ ফেব্ৰুৱাৰীত প্ৰাৰ্থিত্ব প্ৰত্যাহাৰ অন্তমি দিনাই ৰাষ্ট্ৰপতি পদত অনানুষ্ঠানিকভাৱে বিজয়ী ঘোষণা কৰা হ’ব।
সংবিধান অনুসৰি, ৰাষ্ট্ৰপতিয়ে কাৰ্যভাৰ গ্ৰহণ কৰাৰ তাৰিখৰ পৰা পাঁচ বছৰৰ বাবে কাৰ্যনিৰ্বাহ কৰে। বৰ্তমানৰ ৰাষ্ট্ৰপতি আব্দুল হামিদে ২০১৮ৰ ২৪এপ্ৰিলত দায়িত্ব গ্ৰহণ কৰিছিল। সেই অনুসৰি তেওঁৰ পাঁচ বছৰীয়া কাৰ্যকাল ২৩ এপ্ৰিলত সমাপ্ত হ’ব।
পাবনাৰ বাসিন্দা চাহাবুদ্দিন চুপ্পুৰ জন্ম হৈছিল ১৯৪৯ চনত। ছাত্ৰ অৱস্থাত তেওঁ পাবনা জিলা ছাত্ৰ লীগৰ এজন সক্ৰিয় কৰ্মী আছিল আৰু সভাপতি হিচাপেও কাৰ্যনিৰ্বাহ কৰিছিল।
মুক্তি যুদ্ধত সক্ৰিয়ভাৱে অংশগ্ৰহণ কৰা চাহাবুদ্দিন চুপ্পুৱে ১৯৮২ চনত ন্যায় বিভাগত যোগদান কৰে। ২৫ বছৰৰ পিছত তেওঁ ২০০৬ চনত জিলা আৰু সত্ৰ ন্যায়াধীশ হিচাপে অৱসৰ গ্ৰহণ কৰে। ২০১১ চনৰ পৰা ২০১৬ চনলৈ চাহাবুদ্দিন চুপ্পুৱে দুৰ্নীতি নিয়ন্ত্ৰণ আয়োগৰ আয়ুক্ত হিচাপেও কাৰ্যনিৰ্বাহ কৰিছিল।
