কেৰালাৰ আইন বিভাগত দেওবাৰে ৰচিত হয় এক ন ইতিহাস। প্ৰথমবাৰৰ বাবে আজি ৰাজ্যখনত অধিবক্তা হিচাপে নিযুক্তি দিয়া হৈছে এগৰাকী ট্ৰান্সজেণ্ডাৰ ব্যক্তিক।পদ্ম লক্ষ্মী নামৰ ব্যক্তগৰাকীক দেওবাৰে কেৰালাৰ বাৰ কাউন্সিলত অধিবক্তা হিচাপে নিযুক্তি দিয়া হয়।
কেৰেলা বাৰ কাউন্সিলৰ তালিকাত অধিবক্তা হিচাপে নামভৰ্তি কৰা ১৫০০ ৰো অধিক আইন স্নাতক ছাত্ৰ-ছাত্ৰীৰ ভিতৰত পদ্ম লক্ষ্মীও আছিল এগৰাকী।
ৰাজ্যখনত সৃষ্টি হোৱা এই ঐতিহাসিক নজিৰ উপলক্ষে তেওঁক ব্যক্তিগতভাৱে অভিনন্দন জনায় কেৰেলাৰ আইন মন্ত্ৰী পি ৰাজীৱে। লক্ষ্মীৰ সংগ্ৰামক স্বীকাৰ কৰি মন্ত্ৰীগৰাকীয়ে ইনষ্টাগ্ৰাম পোষ্টৰ জৰিয়তে প্ৰশংসা কৰে।
পোষ্টটোত তেওঁ লিখিছে, “জীৱনৰ সকলো বাধা অতিক্ৰম কৰি কেৰালাৰ প্ৰথমগৰাকী ট্ৰান্সজেণ্ডাৰ অধিবক্তা হিচাপে যোগদান কৰা পদ্ম লক্ষ্মীলৈ অভিনন্দন। প্ৰথম হোৱাটো সদায় ইতিহাসৰ আটাইতকৈ কঠিন কৃতিত্ব।”
লক্ষ্যৰ পথত থকা সকলোবোৰ বাধা অতিক্ৰম কৰি পদ্ম লক্ষ্মীয়ে আইনী ইতিহাসত নিজৰ নাম লিখিছে বুলি মন্তব্য কৰে আইন মন্ত্ৰী পি ৰাজীৱে। তেওঁ লগতে লক্ষ্মীৰ কাহিনীয়ে ট্ৰান্সজেণ্ডাৰ সমাজৰ বাকী সকলকো অনুপ্ৰাণিত কৰিব বুলি আশা প্ৰকাশ কৰে।
