মেঘালয়ৰ পূব খাছি পাহাৰ জিলাৰ শ্বিলঙৰ-ডাউকী পথত সংঘটিত এক মৰ্মান্তিক দুৰ্ঘটনাত একে পৰিয়ালৰ পাঁচজন সদস্যৰ প্ৰাণহানি হোৱাৰ পিছত ৰাজ্য চৰকাৰে ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম (NHIDCL)ক পথৰ নিৰ্মাণাধীন অংশত সঠিক সুৰক্ষা চিহ্ন স্থাপনৰ নিৰ্দেশ জাৰি কৰিছে।
প্ৰাপ্ত তথ্য অনুসৰি দেওবাৰে নিশা শ্বিলঙৰ-ডাউকী পথৰ মধ্যভাগত অৱস্থিত ৰংগাইনৰ ওচৰত ৭০ ফুট গভীৰ খাৱৈত এটি শিশুসহ পাঁচজন লোক কঢ়িয়াই নিয়া এখন বাহন সৰি পৰিছিল।
ৰাজহুৱা কাম বিভাগ (পথ)ৰ তদাৰক কৰা উপ-মুখ্যমন্ত্ৰী প্ৰেষ্টন টাইনছঙে জানিবলৈ দিছে যে চৰকাৰে এই অঞ্চলৰ পথৰ সুৰক্ষাৰ অৱস্থা মূল্যায়ন কৰি সুৰক্ষা চিহ্ন স্থাপনৰ নিৰ্দেশ জাৰি কৰিছে। পিটিআইৰ খবৰ অনুসৰি তেওঁ লগতে কয় যে দুৰ্ঘটনাৰ কাৰণ সন্দৰ্ভত এতিয়াও তদন্ত চলি আছে।
ৰাজহুৱা কাম বিভাগৰ (ৰাষ্ট্ৰীয় ঘাইপথ) মুখ্য অভিযন্তাক উচ্চ বিপদজনক অঞ্চল পৰিদৰ্শনৰ দায়িত্ব দিয়া হৈছে আৰু ক্ষতিগ্ৰস্ত পথৰ কাষত সঠিক পথ চিহ্ন স্থাপন কৰাটো নিশ্চিত কৰিবলৈ নিৰ্দেশ দিয়া বুলি সদৰী কৰিছে।
NHIDCL আৰু পথ নিৰ্মাণ কোম্পানীৰ বিষয়াসকলে সোমবাৰে বিধানসভাৰ স্থানীয় সদস্য হিচাপেও কাৰ্যনিৰ্বাহ কৰা টাইনছঙৰ সৈতে সাক্ষাৎ কৰে। উপ-মুখ্যমন্ত্ৰীয়ে স্পষ্ট কৰি কয় যে, “নিৰ্মাণ কোম্পানীৰ বা চালকৰ ভুল বা গাফিলতিৰ বাবে দুৰ্ঘটনা সংঘটিত হৈছে নে নাই, সেয়া এতিয়াও নিৰ্ণয় হোৱা নাই।” লগতে তেওঁ পথৰ সুৰক্ষা বৃদ্ধিৰ লগতে ভৱিষ্যতে এনে দুৰ্ঘটনা ৰোধৰ বাবে প্ৰয়োজনীয় পদক্ষেপ গ্ৰহণ কৰা হৈছে বুলিও জানিবলৈ দিয়ে।
