অহা ছেপ্টেম্বৰৰ পৰা গুৱাহাটীত গাখীৰৰ দাম পুনৰ বৃদ্ধি পাব। উল্লেখ্য যে জুন আৰু জুলাই মাহত দুবাৰ গাখীৰৰ দাম বৃদ্ধিৰ পিছত পুনৰ গাখীৰৰ দাম বৃদ্ধি কৰিছে বৃহত্তৰ গুৱাহাটী দুগ্ধ ব্যৱসায়ী সন্থাই।
সন্থাৰ বিষয়াসকলে জনোৱা মতে, ১ ছেপ্টেম্বৰৰ পৰা প্ৰতি লিটাৰ গাখীৰৰ মূল্য ৩ টকাকৈ বৃদ্ধি পাব। ফলত সাধাৰণ জনতাই এতিয়া প্ৰতি লিটাৰত ৬৭ টকাত গাখীৰ কিনিব লাগিব।
ইয়াৰ লগতে দুগ্ধ ব্যৱসায়ী সন্থাই গাখীৰৰ পাইকাৰী মূল্যও বৃদ্ধি কৰিছে। বৰ্তমান পাইকাৰী গাখীৰ প্ৰতি লিটাৰত ৬১.৪০ টকাত বিক্ৰী হয়। ১ ছেপ্টেম্বৰৰ পৰা পাইকাৰী মূল্য ৩ টকা বৃদ্ধি পাব। ফলত প্ৰতি লিটাৰত ৬৪.৪০ টকা হ’ব। পাইকাৰী মূল্যৰ এই বৃদ্ধিয়ে খুচুৰা বজাৰতো প্ৰভাৱ পেলাব বুলি আশা কৰা হৈছে।
নেপালী মন্দিৰত এক সংবাদমেল দি সন্থাটোৰ এগৰাকী নেতাই কয় যে আমি হোটেল মালিকক প্ৰতি দিনে গাখীৰ বিক্ৰী কৰি আহিছো। ১ ছেপ্টেম্বৰৰ পৰা আমি পাইকাৰী মূল্য ৩ টকা বৃদ্ধি কৰাৰ সিদ্ধান্ত লৈছো। যাৰ ফলত প্ৰতি লিটাৰত ৬৪.৪০ টকা হ’ব। আমি আশা কৰিছো যে এই সময়ছোৱাত হোটেল মালিককে ধৰি আমাৰ গ্ৰাহকসকলে আমাক সহযোগ কৰিব।
খুচুৰা গ্ৰাহকৰ বাবেও এই মূল্য ৩ টকা বৃদ্ধি পাব, যাৰ ফলত প্ৰতি লিটাৰত মুঠ দাম হ’ব ৬৭টকা।
ইয়াৰ উপৰি দুগ্ধ ব্যৱসায়ী সন্থাই জনসাধাৰণক সজাগ হৈ থাকিবলৈ আহ্বান জনাইছে যাতে নিৰ্ধাৰিত প্ৰতি লিটাৰত ৬৭ টকাতকৈ অধিক ধন কোনে সংগ্ৰহ কৰিব নোৱাৰে।
বিষয়াগৰাকীয়ে লগতে প্ৰশাসনক অনুৰোধ জনাই যাতে কোনো ধৰণৰ অতিৰিক্ত মূল্য কোনেও গ্ৰাহকৰ পৰা আদায় কৰিব নোৱাৰে।
