১৬ মে’ কে বাদ আসাম মে এক হি বাংলাদেশী নেহি ৰহেংগে….. সব কোচ সামান লেকৰ যানা পৰেগা…. য়ে লিখকৰ ৰখিয়ে……
এয়া আছিল ২০১৪ চনৰ লোকসভা নিৰ্বাচনৰ পূৰ্বে দেশৰ প্ৰধান মন্ত্ৰী নৰেন্দ্ৰ মোদীয়ে দিয়া ভাষণৰ এটা অংশ। য’ত তেওঁ উল্লেখ কৰিছিল ১৬ মে’ৰ পাছত অসমত এজনো বাংলাদেশী নাথাকে, সকলোৱে টালি-টোপোলা লৈ যাব লাগিব এই কথা লিখি ৰাখক।
তেতিয়াৰ পৰাই অসমৰ এক জলন্ত সমস্যা বুলি গণ্য কৰা বিদেশী সমস্যা কেন্দ্ৰত মোদী চৰকাৰ আহিলেই দূৰ হ’ব বুলি ভাবিয়েই ঐতিহাসিক দিন হিচাপে ডায়েৰিত লিপিৱদ্ধ কৰি ৰাখিছিল।
সকলোৱে এই দিনটোত আশাৰে বাট চাই ৰৈ ৰৈ অৱশেষত এই দিনটোত বাংলাদেশীয়ে টালি-টোপোলা বন্ধা দিৱস হিচাপে নামাকৰণ কৰি সামাজিক মাধ্যমত ৰগৰ কৰা আৰম্ভ কৰিছে।
কিন্তু প্ৰকৃততে অসমৰ লগতে অন্য ৰাজ্যত কেইগৰাকী বাংলাদেশীয়ে টালি-টোপোলা বান্ধি ঘৰমুৱা হ’ল? সেয়া আজিৰ দিনটোৰ বাবে এক লাখটকীয়া প্ৰশ্ন।
এতিয়া যেন মোদীয়ে সেয়া অসমবাসীক জাতীয় স্বাৰ্থ অথবা সুৰক্ষা প্ৰদান কৰিম বুলি মুঙ্গৰীলাল কি হচিন স্বপ্নাৰ দৰে এই ডাইলগৰে অসমৰ জাতীয়তাবাদী জনতাৰ মন আকৰ্ষিত কৰিছিল।
কিন্তু বাস্তৱত যেন সেয়া শূণ্য। তাৰ বিপৰীতে বাংলাদেশী বিতাৰণৰ ক্ষেত্ৰত যোৱা ৭টা বৰ্ষত কোনো বিশেষ পদক্ষেপ হাতত নল’লে বিজেপি নেতৃত্বাধীন কেন্দ্ৰীয় চৰকাৰে।
সেয়েহে আজিৰ দিনটো ‘বাংলাদেশীয়ে টালি-টোপোলা বন্ধা দিৱস’ৰ সপ্তম বৰ্ষ হিচাপে খুহুতীয়াভাৱে উদযাপন কৰা পৰিলক্ষিত হৈছে।
বাতৰিটোত এইখিনিতে বাংলাদেশী বিতৰণৰ কিছু তথ্য পাঠক ৰাইজলৈ বুলি দাঙি ধৰিলো।
কেন্দ্ৰীয় গৃহ মন্ত্ৰণালয়ে যোৱা বৰ্ষচ ৰাজ্যসভাৰ মজিয়াত দিয়া তথ্য অনুসৰি অসমৰ পৰা ২০১৭ চনত ১১ গৰাকী, ২০১৮ চনত ১১ গৰাকী আৰু ২০১৯ ত ৮ গৰাকী বাংলাদেশীক বিতাৰণ কৰা হৈছে বাংলাদেশলৈ। ২০২০ চনত এগৰাকীও বাংলাদেশীক বিতাৰণ কৰিব পৰা নাই বিজেপি চৰকাৰে।
সেইদৰে সমগ্ৰ ভাৰততে ২০১৭ চনত ১১৭৫ গৰাকী, ২০১৮ চনত ১১১৮ গৰাকী, ২০১৯ ত ১৩৫১ গৰাকী আৰু ২০২০ চনত ৮৩ গৰাকী বাংলাদেশী নাগৰিকক বিতাৰণ কৰা হৈছে।
তাৰ বিপৰীতে পশ্চিমবংগত ২০১৭ চনত ৯৯২ গৰাকী, ২০১৮ ত ৯০০ গৰাকী, ২০১৯ ত ১১৬৭ গৰাকী আৰু ২০২০ ত ৭৪ গৰাকী বাংলাদেশীক বিতাৰণ কৰা হৈছে।
ঠিক সেইদৰে ত্ৰিপুৰাতো ২০১৭ চনত ১২২ গৰাকী, ২০১৮ চনত ১৬৫ গৰাকী, ২০১৯ ত ১২৬ গৰাকী আৰু ২০২০ চনত ৮ গৰাকী বাংলাদেশী নাগৰিকক বিতাৰণ কৰা হৈছে।
ওপৰৰ তথ্যৰ পৰা গম পোৱা গ’ল যে, অন্য ৰাজ্যৰ তুলনাত অসমৰ পৰা আটাইতকৈ কম বাংলাদেশী বিতাৰণ হৈছে। ২০১৭ চনৰ পৰা মাত্ৰ ৩০ গৰাকী বিদেশীয়েহে টালি-টোপোলা বান্ধিছে অসমত।
য’ত নেকি অসমৰ বিভিন্ন দল-সংগঠনে ঐতিহাসিক অসম আন্দোলনৰ সময়ৰে পৰা অসমত লাখ-লাখ বাংলাদেশীৰ ৰম্যভূমিত পৰিণত হোৱা বুলি বিভিন্ন প্ৰতিবাদ সাব্যস্ত কৰি অহাৰ লগতে কেন্দ্ৰীয় গৃহ মন্ত্ৰণালয়ৰ তথ্যতে অসমত বহু লক্ষাধিক বাংলাদেশী আছে বুলি প্ৰমাণিত হৈছে। তেনেক্ষেত্ৰত চাৰিটা বছৰত মাত্ৰ ৩০ গৰাকী বাংলাদেশী বিতাৰণ কৰা বিষয়টোৱে সঁচাকৈয়ে মোদীৰ ভাষণ যে চমক সৃষ্টিকাৰী আছে সেয়া প্ৰমাণিত কৰিছে।
বাংলাদেশীয়ে টালি-টোপোলা বন্ধা প্ৰসংগ ইয়াতেই এৰিছো। কিন্তু জাতিধ্বংসী নাগৰিকত্ব সংশোধনী বিধেয়কৰ জৰিয়তে এইখন চৰকাৰে আনিব বিচাৰিছে লাখে-লাখে বিদেশী, যি নেকি অসমৰ সাতাম পুৰুষীয়া ঐতিহ্য, কলা সংস্কৃতি, ভাষা সকলোতে আঘাত হানিব বুলি বাৰম্বাৰ অসমৰ বিভিন্ন জাতীয় দল সংগঠনে কৈ আহিছে।
উল্লেখ্য সদ্য প্ৰয়াত বিশিষ্ট কথাশিল্পী হোমেন বৰগোহাঁঞিয়েও ২০১৯ ৰ ১৭ ডিচেম্বৰত নগাওঁ নেহেৰুবালি গ্ৰন্থমেলাত ‘কা ব্যৰ্থ কৰিব নোৱাৰিলে অসমীয়া ভাষাৰ মৃত্যু হ’বলৈ বেছি দিন নাই’ বুলি নিজৰ ভাষণত কৈ গৈছিল।
