মঙলবাৰে সংখ্যালঘু উন্নয়ন দপ্তৰৰ মন্ত্ৰী ৰঞ্জিত দত্তৰ সৈতে ২১টা খিলঞ্জীয়া মুছলমান সংগঠনৰ গুৰুত্বপূৰ্ণ বৈঠকৰ পিছতেই নিজৰ নাম সলনি কৰিলে সংখ্যালঘু উন্নয়ন পৰিষদৰ অধ্যক্ষ মমিনুল আৱালে।
বুধবাৰে দিচপুৰ প্ৰেছ ক্লাবত এক সংবাদমেল সম্বোধন কৰি এই কথা ঘোষণা কৰে জনগোষ্ঠীয় সমন্বয় পৰিষদৰ মুখ্য আহ্বায়ক মমিনুল আৱালে।
‘মই আজিৰ পৰা নিজৰ নামৰ পাছফালে গৰিয়া লিখি ল’ম। মই যিহেতু গৰিয়া সম্প্ৰদায়ৰ খিলঞ্জীয়া মুছলমান গতিকে এতিয়াৰে পৰা মোৰ নাম চৈয়দ মমিনুল আৱাল গৰিয়া। দুই এদিনতে আদালতত শপতনামা দাখিলৰে এই নামেৰে জনাজাত হ’ম’, সংবাদমেলত এইদৰে কয় আৱালে।
ইপিনে, উক্ত সংবাদমেলৰ জৰিয়তে গৰিয়া, মৰিয়া, দেশী আৰু জুলহা সম্প্ৰদায়ৰ লোককে নিজৰ নিজৰ নামৰ পাছফালে সম্প্ৰদায়ৰ নামটো লগাই ল’বলৈ আহ্বান জনায় আৱালে।
উল্লেখ্য যে যোৱা ১০ ফেব্ৰুৱাৰি অৰ্থাৎ সোমবাৰে ধিঙৰ এখন প্ৰতিবাদী সভাত আহোমসকলক খিলঞ্জীয়া নহয় তথা পূৰ্ববংগীয় মূলৰ মুছলমানখিনিহে প্ৰকৃত খিলঞ্জীয়া বুলি দাবী কৰা আমিনুল ইছলামক উভটি ধৰি কটাক্ষ কৰে মমিনুল আৱালে।
তেওঁ কয় ‘আমিনুল ইছলামৰ বক্তব্য সুস্থ মগজুৰ কোনো অসমীয়া মানুহে প্ৰদান কৰিব নোৱাৰে। এ আই য়ু ডি এফৰ লোকসকলৰ মগজুৰ বিকৃতি ঘটিছে। মগজুৰ বিকৃতি ঘটা মানুহেহে আমিনুল ইছলামৰ দৰে বক্তব্য দিব পাৰে।‘
তদুপৰি, আহোম জনগোষ্ঠীটোৱে অসমত প্ৰায় ৬০০ বছৰ ৰাজত্ব কৰিছিল বুলি সদৰী কৰি তেওঁ লগতে কয়, ‘পৃথিৱীৰ এনে কোনো ৰাজবংশ নাই যি বিশ্বৰ কোনো প্ৰান্তত ৬০০ বছৰ ৰাজত্ব কৰিছিল। গতিকে এই বংশটোক লৈ আমিনুল ইছলামৰ দৰে বাংলাদেশী মূলৰ বিধায়কে যি মন্তব্য কৰিছে সেই মন্তব্যক আমি ধিক্কাৰ দিছো’।
ইপিনে, অতি সোনকালে আমিনুল ইছলামক এই বিষয়টোৰ সম্পৰ্কত প্ৰশাসনে মাতি আনি সোধা-পোছা কৰিব লাগে বুলি দাবী জনায় আৱালে লগতে কয়, ‘কাৰণ আমিনুল ইছলামৰ নিচিনা মগজুৰ বিকৃতি ঘটা বিধায়কৰ বক্তব্যই অসমীয়া সমাজ জীৱনত আঘাত হানিছে’।
