যোৱা ২৪ ফেব্ৰুৱাৰীৰ পৰা ৰাছিয়াই ইউক্ৰেইনত আক্ৰমণ চলাই দেশখনৰ বহুকেইখন চহৰ দখল কৰিছে। কিন্তু ইউক্ৰেইনত আক্ৰমণৰ বিৰুদ্ধে ৰাছিয়াত যুদ্ধবিৰোধী প্ৰতিবাদ চলিছে।
ৰাছিয়াৰ প্ৰশাসনে বিভিন্ন নিষেধাজ্ঞা জাৰি কৰিলেও দেশখনত প্ৰতিবাদৰ কাৰ্যসূচী অব্যাহত আছে।
দেওবাৰে যুদ্ধবিৰোধী প্ৰতিবাদী কাৰ্যসূচী ৰূপায়ন কৰি ৪হাজাৰ ৩০০লোকক আটক কৰা হয়। ইয়াৰ ভিতৰত অকল মস্কোৰ পৰাই ১হাজাৰ ৭০০ প্ৰতিবাদকাৰীক আটক কৰা হৈছে।
মানৱাধিকাৰ সংস্থা ওভিডি-ইনফোৱে জানিবলৈ দিয়া মতে মুঠ ৫৩খন চহৰৰ পৰা প্ৰতিবাদকাৰীসকলক আটক কৰা হৈছে। আক্ৰমণ আৰম্ভ হোৱাৰ পৰা এঘাৰ দিনলৈকে মুঠ ১০হাজাৰতকৈয়ো অধিক প্ৰতিবাদকাৰীক ৰাছিয়াৰ প্ৰশাসনে আটক কৰিছে।
লগতে পঢ়ক: ইণ্ডিয়া টুডে+এক্সিছ মাই ইণ্ডিয়াৰ সমীক্ষাত পঞ্জাৱত বিশাল বিজয়ৰ দিশে আম আদমী পাৰ্টী
ইউক্ৰেইনত ৰাছিয়াৰ আগ্ৰাসন আৰম্ভ হোৱাৰ পিছত কাৰাগাৰৰ পৰা বিৰোধী নেতা এলেক্সি নাভালনিয়ে জনসাধাৰণক যুদ্ধৰ বিৰুদ্ধে প্ৰতিবাদী কাৰ্যসূচী গ্ৰহণ কৰিবলৈ আহ্বান জনায়।
আনহাতে, ৰাষ্ট্ৰসংঘৰ শৰণাৰ্থী বিষয়ক সংস্থা ইউএনএইচচিআৰ-য়ে জানিবলৈ দিছে যে এই যুদ্ধৰ ফলত ইউক্ৰেইনৰ ১৫লাখতকৈয়ো অধিক লোক গৃহহীন হৈছে।
