পঞ্চায়ত নিৰ্বাচনৰ ভোটগণনাই দুদিন অতিক্ৰম কৰিলে যদিও আজিও সম্পূৰ্ণ ফল জানিবলৈ পোৱা নাই ৰাজ্যবাসীয়ে। যোৱা ১২ ডিচেম্বৰৰ পৰাই চলি থকা এই ভোটগণনা আজি ৰাতিৰ ভিতৰত সম্পূৰ্ণ হ’ব বুলি জানিবলৈ দিছে ৰাজ্যিক নিৰ্বাচনী আয়ুক্তই।
আজি ৰাজ্যিক নিৰ্বাচনী আয়োগৰ কাৰ্য্যালয়ত আয়োজন কৰা এখন সংবাদমেলত ৰাজ্যিক নিৰ্বাচনী আয়ুক্ত হৰেন্দ্ৰ নাথ বৰাই কয় যে এতিয়ালৈকে ২৮খন জিলা, মহকুমাৰ পৰা নিৰ্বাচনী ফলাফল আহিছে। কাছাৰ আৰু ধুবুৰীত এতিয়াও ভোটগণনা চলি আছে।
২১৯৯০টা ৱাৰ্ড সদস্যপদৰ ভিতৰত ১৭৬৭৭টাৰ ৰিজাল্ট ঘোষণা কৰা হৈছে। শতাংশ হিচাপত ৮০.৩৮%।
ইয়াৰে অগপই ১৩৭২টা, বিজেপিয়ে ৭৫৪০টা, কংগ্ৰেছ ৫৮৯৬টা, চি পি আই ৩, চি পি আই এম ২৭টা, চি পি আই (এম এল)ৰ ৭টা, এ আই য়ু ডি এফে ৭৫৫টা, বি পি এফে ৪৭টা, তৃণমূল কংগ্ৰেছে ২টা আৰু নিৰ্দলীয়ই ২০২৮টা পদত জয়ী হৈছে।।
সভাপতি পদৰ ২১৯৯টাৰ ভিতৰত ১৮৮১টাৰ ফল ঘোষণা কৰা হৈছে। শতাংশ হিচাপত ৮৫.৫ শতাংশ। তাৰ ভিতৰত অগপই ১১০টা, বিজেপিয়ে ৮৬৭টা, কংগ্ৰেছে ৬৪৫টা, চি পি আই (এম)-এ ১টা, এ আই য়ু ডি এফে ১০৬টা, বি পি এফে ২টা আৰু নিৰ্দলীয়ই ১৫০টাত জয়ী হৈছে।
আঞ্চলিক পঞ্চায়ত সদস্যৰ ২১৯৯টা পদৰ ভিতৰত ১৮৬০টাৰ ফল ঘোষিত হৈছে। শতাংশ হিচাপত ৮৫.৫৮ শতাংশ। অগপই ৯৬টা, বিজেপিয়ে ৮৮৩টা, কংগ্ৰেছ ৬৪৫টা, চি পি আই (এম)-এ ১টা, এ আই য়ু ডি এফে ১১১টা আৰু নিৰ্দলীয়ই ১২৪টাত জয়ী হৈছে।
জিলা পৰিষদ সদস্যৰ ৪২০টা পদৰ ভিতৰত ৩৪৭টাৰ ফল ঘোষণা কৰা হৈছে। শতাংশ হিচাপত ৮২.৬ শতাংশ। অগপই ১৫টা, বিজেপিয়ে ১৮১টা, কংগ্ৰেছ ১২২টা, এ আই য়ু ডি এফে ১৫টা আৰু নিৰ্দলীয়ই ১৪টাত জয় সাব্যস্ত কৰিছে।
আনহাতে খেলিমেলিৰ বাবে সৰ্বমুঠ ৯৭টা কেন্দ্ৰত পুনৰ ভোটগ্ৰহণ হৈছে। ইয়াৰে ৯৫টা কেন্দ্ৰত ইতিমধ্যে হৈ গ’ল আৰু বাকী ২টাত কাইলৈ পুনৰ ভোটগ্ৰহণ হ’ব। কাইলৈ ভোটগ্ৰহণ হ’ব গহপুৰৰ বৰতামুলী গাওঁ পঞ্চায়তৰ ৱাৰ্ড নং ১ত আৰু হাইলাকান্দিৰ দৰিয়াৰঘাট কাৰিচেৰা গাওঁ পঞ্চায়তৰ অধীনৰ শ্যামপুৰ এম ই ইনষ্টিটিউট ভোটকেন্দ্ৰত পুনৰ ভোটগ্ৰহণ হ’ব। দুয়োটা কেন্দ্ৰতে জিলা পৰিষদৰ সদস্য পদৰ বাবে পুনৰ ভোটগ্ৰহণ হ’ব।
ৰাজ্যিক নিৰ্বাচনী আয়ুক্ত হৰেন্দ্ৰ নাথ বৰাই কয় যে বেলট পেপাৰ ব্যৱহাৰ হোৱা বাবে এইবাৰ ভোটগণনা লেহেমীয়া হৈছে।
