ৰাজধানী দিল্লীৰ ৰাজপথত মহিলা সাংসদ সুধা ৰামকৃষ্ণনৰ ডিঙিৰ পৰা সোণৰ চেইন কাঢ়ি লৈ পলাল চিলনী চোৰে। সোমবাৰে পুৱা প্ৰায় ৬:৩০ বজাত চাণক্যপুৰীত খোজকাঢ়ি গৈ থকা অৱস্থাত তেওঁ এজন দুষ্কৃতিকাৰীৰ হাতত আক্ৰান্ত হয়।
ডিঙিৰ চেইন টানি নিয়াত আঘাত পায়, তেওঁৰ কাপোৰো ফাটি যায়। সাংসদগৰাকীয়ে কেন্দ্ৰীয় গৃহমন্ত্ৰী অমিত শ্বাহলৈও এখন পত্ৰ লিখি এই বিষয়ে অৱগত কৰে।
আৰক্ষীৰ সূত্ৰ অনুসৰি, সোমবাৰে পুৱা পোলেণ্ডৰ দূতাবাসৰ সমীপত সংঘটিত হয় এই ঘটনা। সাংসদগৰাকী আৰ সুধাই পৰিচিত এগৰাকীৰ লগত খোজ কাঢ়ি গৈ আছিল। সেই সময়তে হেলমেট পিন্ধা এজন যুৱকে স্কুটিত উঠি আহি হঠাতে তেওঁৰ ডিঙিৰ পৰা সোণৰ চেইনডাল কাঢ়ি লৈ পলাই যায়। জোৰেৰে টনাৰ ফলত সাংসদগৰাকীয়ে ডিঙিত আঘাতপ্ৰাপ্ত হয় আৰু তেওঁৰ চুৰিদাৰো ফাটি যায়। ঘটনাৰ পিছত সুধা আৰু তেওঁৰ সংগীয়ে সহায়ৰ বাবে চিঞৰ-বাখৰ কৰে।
সুধাই কয় যে স্কুটি চালকজনে প্ৰথমে খুব লেহেমীয়াকৈ গাড়ী চলাইছিল, সেয়ে সন্দেহ কৰাৰ কোনো কাৰণ নাছিল। হঠাৎ সি চেইনডাল টানি নিয়ে।
বৰ্তমান সাংসদ সুধা তামিলনাডু ভৱনত থাকে। ঘটনাৰ পিছতে কেন্দ্ৰীয় গৃহমন্ত্ৰী অমিত শ্বাহলৈ এখন পত্ৰ লিখি নিৰাপত্তা সন্দৰ্ভত প্ৰশ্ন উত্থাপন কৰে। তেওঁ লিখিছে, ‘এই ঠাইখন দেশৰ অন্যতম নিৰাপদ অঞ্চল। ইয়াত যদি এগৰাকী মহিলা সাংসদ আক্ৰান্ত হয় তেন্তে সাধাৰণ জনতাৰ কি সুৰক্ষা থাকিব?’
তেওঁ ইমান গুৰুত্বপূৰ্ণ আৰু নিৰাপদ এলেকাত এনে ঘটনা অতি চিন্তনীয় বুলিও কয়। দোষীক তৎকালীনভাৱে চিনাক্ত কৰি গ্ৰেপ্তাৰ কৰিবলৈ কেন্দ্ৰীয় চৰকাৰৰ হস্তক্ষেপ বিচাৰিছে সাংসদগৰাকীয়ে।
এই ঘটনাত দিল্লী আৰক্ষীয়ে গোচৰ ৰুজু কৰি তদন্ত আৰম্ভ কৰিছে। চাণক্যপুৰী আৰু ইয়াৰ আশে-পাশে থকা অঞ্চলৰ চিচিটিভি ফুটেজ পৰীক্ষা কৰা হৈছে। অৱশ্যে এই পৰ্যন্ত কোনো লোকক গ্ৰেপ্তাৰ কৰা হোৱা নাই।
