থাইলেণ্ডৰ পাট্টায়াত অনুষ্ঠিত হোৱা মিষ্টাৰ য়ুনিভাৰ্ছ আৰু প্ৰ’ মিষ্টাৰ এছিয়া ২০১৮ত দুটাকৈ স্বৰ্ণ পদক অৰ্জন কৰি দেশ তথা অসমলৈ গৌৰৱ কঢ়িয়াই অনা গোলাপ ৰাভা আজি দুপৰীয়া নিজৰ গৃহ ৰাজ্য অসমত উপস্থিত হয়।
বৰঝাৰ বিমানবন্দৰত উপস্থিত হোৱাৰ লগে লগে শৰীৰ চৰ্চাবিদগৰাকীক তেওঁৰ পৰিয়ালৰ সদস্য, অসংখ্য গুণমুগ্ধ তথা দল-সংগঠনে ফুলৰ মালাৰ লগতে গামোচা পিন্ধাই উষ্ম আদৰণি জনায়।
এনেদৰে আন্তঃৰাষ্ট্ৰীয় পৰ্যায়ত ভাল প্ৰদৰ্শন কৰি দেশলৈ তথা ৰাজ্যলৈ গৌৰৱ কঢ়িয়াই আনিবলৈ পাই যথেষ্ট সুখী বুলি মন্তব্য কৰে গোলাপ ৰাভাই।
ডব্লিউ এফ এফ-ডব্লিউ বি বি এফৰ উদ্যোগত যোৱা ২৪ আৰু ২৫ নৱেম্বৰত অনুষ্ঠিত হোৱা প্ৰতিযোগিতাখনত অসমৰ শৰীৰ চৰ্চাবিদগৰাকীয়ে আশী কিলোগ্ৰামৰ দুটা ইভেণ্টত অংশগ্ৰহণ কৰি দুয়োটা ইভেণ্টতে সোণৰ পদক অৰ্জনেৰে ‘মিষ্টাৰ য়ুনিভাৰ্ছ’ আৰু ‘মিষ্টাৰ এছিয়া’ৰ সন্মানৰ অধিকাৰী হয়।
উল্লেখ্য যে বকোৰ কলিয়াবৰীৰ নিবাসী গোলাপ ৰাভাই ইয়াৰ পূৰ্বেও ২০১৭ আৰু ১৮ বৰ্ষত মিষ্টাৰ ইণ্ডিয়া আৰু ২০১৮ বৰ্ষতে মিষ্টাৰ এছিয়া খিতাপ দখল কৰি অসমবাসীক গৌৰৱান্বিত কৰিছিল।
