চেন্নাই ছুপাৰ কিংছৰ অনুৰাগীৰ বাবে ভাল খবৰ। অধিনায়কৰ আৰ্মবেণ্ড পুনৰ এবাৰ পৰিধান কৰিব মহেন্দ্ৰ সিং ধোনীয়ে। প্ৰতিখন খেলতে পৰাস্ত হৈ হৈ লীগত পিছ পৰি থকা চেন্নাই ছুপাৰ কিংছ ধোনীৰ স্পৰ্শত পুনৰুজ্জীৱিত হ’বনে?
শুকুৰবাৰৰ পৰা চি এছ কে শিবিৰৰ নেতৃত্ব দিব ধোনীয়ে। চলিত ছিজন অপ্ৰত্যাশিতভাৱে অন্ত পৰিল ৰুতুৰাজ গাইকোৱাডৰ। এই ছিজনত তেওঁ আৰু খেলিব নোৱাৰিব। খবৰ পোৱা গৈছে যে তেওঁৰ কঁকালত ফাট মেলিছে।
শুকুৰবাৰে চিপকত চিএছকে বনাম কেকেআৰৰ মেচ। এই ৰোমাঞ্চকৰ খেলখনৰ পূৰ্বে চেন্নাই ছুপাৰ কিংছৰ বাবে বহু ভাল খবৰৰ লগতে বেয়া খবৰ। ৰুতুৰাজৰ দৰে বেটছমেন বাহিৰ হোৱাৰ অৰ্থ হ’ল চেন্নাইৰ বেটিং বিভাগত শক্তিহীনতা।
আনহাতে কম্পিউটাৰতকৈও চোকা মগজুৰ অধিকাৰী ধোনীৰ অধিনায়ক হিচাপে প্ৰত্যাৱৰ্তনৰ অৰ্থ হ’ল চি এছ কেই প্ৰতিযোগিতাখনত ঘূৰি আহিবলৈ আপ্ৰাণ চেষ্টা চলাব। কোৱা বাহুল্য যে কে কে আৰৰ বাবে চিপকত কামটো আৰু অধিক কঠিন হৈ পৰিল।
বৃহস্পতিবাৰে এই খবৰ ঘোষণা কৰে চেন্নাইৰ মুখ্য প্ৰশিক্ষক ষ্টিফেন ফ্লেমিংয়ে। বৰ্তমানৰ আই পি এলত চেন্নাইক নিস্তেজ দেখা গৈছে। পাঁচখন খেলৰ ভিতৰত মাত্ৰ এখন খেলত জয়লাভ কৰিছে চি এছ কেই। লীগ টেবুলত ৯ নম্বৰ স্থানত আছে হালধীয়া জাৰ্চিৰ দলটো।
ৰুতুৰাজ কেনেকৈ আঘাতপ্ৰাপ্ত হ’ল? ৰাজস্থান ৰয়েলছৰ বিৰুদ্ধে খেলখনত তুষাৰ দেশপাণ্ডেৰ এটা বল ৰুতুৰাজৰ কঁকালত খুন্দা মাৰে। তাৰ পিছতো তেওঁ দুখন মেচ খেলিছিল।
কিন্তু স্কেন ৰিপৰ্টত দেখা গৈছে যে ৰুতুৰাজ গাইকোৱাডৰ কঁকাল ফাট মেলিছে। ৰুতুৰাজৰ বিদায়ৰ লগে লগে নেতৃত্বৰ দায়িত্ব ধোনীৰ ওপৰত পৰিল। চেন্নাইৰ বেয়া সময়ত ধোনীয়ে নেতৃত্বৰ দায়িত্ব লোৱাৰ লগে লগে অনুৰাগীসকলে অনুভৱ কৰে যে এইবাৰ চি এছ কেৰ প্ৰত্যাৱৰ্তনৰ সময়। শুকুৰবাৰৰ চি এছ কে বনাম কে কে আৰ মেচৰ গুৰুত্ব হঠাতে বাঢ়ি গ’ল। ধোনীৰ নেতৃত্বই এই মেচৰ উত্তাপ বহুগুণ বৃদ্ধি কৰিলে।
