ৰিলায়েন্স ইণ্ডাষ্ট্ৰীজৰ স্বত্বাধিকাৰ তথা এছিয়াৰ আটাইতকৈ ধনী ব্যক্তি উদ্যোগপতি মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ অভিযোগত ৰাষ্ট্ৰীয় তদন্তকাৰী সংস্থা নিয়াই যোৱা নিশা গ্ৰেপ্তাৰ কৰে মুম্বাই আৰক্ষীৰ জ্যেষ্ঠ বিষয়া শচীন ৱাজেক।
প্ৰায় ১২ ঘণ্টা ধৰি জেৰা চলোৱাপৰ অন্ত নিয়াই আৰক্ষী বিষয়া জনক গ্ৰেপ্তাৰ কৰে।
উল্লেখ্য ২৫ ফেব্ৰুৱাৰীত আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ অভিযোগ উত্থাপন হৈছিল আৰক্ষী বিষয়া জনৰ বিৰুদ্ধে।
তাৎপৰ্যপূৰ্ণ ভাবে বাহন খনৰ স্বত্বাধিকাৰ মনসুখ হীৰেণৰ মৃতদেহ পৰৱৰ্তী সময়ত ৰহস্যজনক অৱস্থাত উদ্ধাৰ হৈছিল।
মনসুখৰ পত্নী বিমলা হীৰেণে অভিযোগ কৰা অনুসৰি আৰক্ষী বিষয়া ৱাজেই আম্বানীৰ ঘৰৰ সন্মুখত ৰখা বাহন খন দীৰ্ঘ দিন ধৰি তেওঁৰ স্বামীৰ পৰা নি ব্যৱহাৰ কৰি আছিল।
ইয়াৰ পিছতে নিয়াই তদন্ত আগবঢ়াই নিয়ে আৰু বাৰ ঘণ্টীয়া জেৰাৰ অন্তত আৰক্ষী বিষয়া জনক গ্ৰেপ্তাৰ কৰে।
মুকেশ আম্বানীৰ ঘৰৰ সন্মুখত বিস্ফোৰক ভৰ্তি বাহন ৰখাৰ দায়িত্ব স্বীকাৰ ইছলামিক সন্ত্ৰাসবাদী সংগঠন জইছ-উল-হিন্দে স্বীকাৰ কৰা বুলি কোৱা হৈছিল যদিও সংগঠনটোৱে সেই কাম কৰা নাই বুলি স্পষ্টীকৰণ দিয়াৰ পিছতে ঘটনাটোৱে অন্য মোৰ লৈছিল।
টেলিগ্ৰাম এপৰ জৰিয়তে আজি সংগঠনটোৱে এই দায়িত্ব স্বীকাৰ কৰিছিল।
উল্লেখ্য আম্বানিৰ বাসভৱন এন্টিলিয়াৰ সন্মুখত উদ্ধাৰ হৈছিল এখন বিস্ফোৰক ভৰ্তি গাড়ী।
পৰিত্যক্ত এখন গাড়ী অঞ্চলটোত ৰৈ থকা দেখি স্থানীয় বাসিন্দাসকলৰ সন্দেহ ওপজে। লগে লগে তেওঁলোকে আৰক্ষীক খবৰ দিয়ে।
আবেলি সংঘটিত এই ঘটনাই স্বাভাৱিকতে আতংকৰ সৃষ্টি কৰে। বহুসময় ধৰি এখন এছ য়ু ভি আম্বানিৰ ঘৰৰ সন্মুখত ৰৈ থকা দেখা গৈছিল।
মুম্বাই আৰক্ষীয়ে ততাতয়াকৈ বোম স্কোৱাডক খৱৰ দিয়ে। বোম স্কোৱাড আহি গাড়ীখন পৰীক্ষা কৰি দেখা পায় যে পৰিত্যক্ত গাড়ীখনত ২০ডাল জিলেটিন ষ্টিক আছে।
গামদেবী থানাৰ পৰা অহা বিশাল আৰক্ষী বাহিনীয়ে গোটেই অঞ্চলটো ঘেৰি পেলায়। তদুপৰি, ডগ স্কোৱাডকো মাতি পঠিওৱা হয়।
গাড়ীখনৰ ভিতৰত কেইবাখনো নাম্বাৰ প্লেট পোৱা গৈছিল। আৰক্ষীয়ে জানিবলৈ দিয়া মতে মুকেশ আম্বানিৰ নিৰাপত্তাত ব্যৱহৃত গাড়ীৰ নম্বৰৰ সৈতে নাম্বাৰ প্লেটৰ নম্বৰৰ মিল আছে।
