চলিত বছৰ আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰা ভাৰতীয় দলৰ প্ৰাক্তন ক্ৰিকেটাৰ সুৰেশ ৰাইনাই এক নতুন বিতৰ্কৰ মাজত সোমাই পৰিছে।
এইগৰাকী বিস্ফোৰক বাঁওহতীয়া বেটছমেনৰ বিৰুদ্ধে মুম্বাইত ৰুজু হৈছে গোচৰ।
মুম্বাইৰ ড্ৰেগন ফ্লাই পাবত সুৰেশ ৰাইনাই ক’ৰ’না নিয়ম উলংঘন কৰা বুলি জানিব পৰা গৈছে।
আৰক্ষীৰ অভিযানত ৰাইনাৰ উপৰি বলিউদ গায়ক গুৰু ৰান্ধৱা, ঋত্তিক ৰোশনৰ প্ৰাক্তন পত্নী চুজেন খানক ক’ৰ’নাৰ নীতি-নিয়ম উলংঘন কৰাৰ অপৰাধত গ্ৰেপ্তাৰ কৰে।
অৱশ্যে আটাইবোৰকে পৰৱৰ্তী সময়ত জামিনত মুক্তি দিয়ে।
পঞ্চ তাৰকা হোটেলস্থিত এই ক্লাবটোত ক’ৰ’নাৰ নীতি-নিয়ম নমনাৰ অভিযোগ উত্থাপিত হৈছে। সামাজিক দূৰত্ব বজাই ৰখা দূৰৈৰ কথা কোনো লোকৰে মুখত নাছিল মাস্ক।
আৰক্ষীৰ সূত্ৰই জানিব দিয়া মতে পাৰ্টিটোত বলিউদৰ আন কেইবাজনো শীৰ্ষ পৰ্যায়ৰ তাৰকা আছিল।
অৱশ্যে বৰ্তমান সেই লোক সকলৰ নাম প্ৰকাশ হোৱা নাই। ক্লাবৰ সঞ্চালকৰ বিৰুদ্ধেও পদক্ষেপ গ্ৰহণ কৰা হৈছে।
৩৪ বছৰীয়া ক্ৰিকেটাৰ সুৰেশ ৰাইনাৰ বিৰুদ্ধে ধাৰা ১৮৮ৰ অধীনত গোচৰ ৰুজু কৰা হৈছে।
মুম্বাইৰ কোন থানাত গোচৰ ৰুজু হৈছে সেই বিষয়ে এই পৰ্যন্ত তথ্য লাভ কৰা হোৱা নাই।
উল্লেখ্য যে ২০২০ বৰ্ষটোত বিভিন্ন কাৰণৰ বাবে চৰ্চাত থকা সুৰেশ ৰাইনাই চলিত বছৰৰে ১৫ আগষ্টত আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল।
