চিৰদিনৰ বাবে চকু মুদিলে নাগালেণ্ডৰ প্ৰখ্যাত সাহিত্যিক টেমচুলা আও- এ। দেওবাৰে নিশা নাগালেণ্ডৰ ডিমাপুৰৰ এখন ব্যক্তিগত চিকিৎসালয়ত টেমচুলা আওৰ মৃত্যু হয়। মৃত্যুৰ সময়ত আওৰ বয়স আছিল ৮০ বছৰ।
সাহিত্যকৰ্মৰ জৰিয়তে নগা সংস্কৃতিক জনপ্ৰিয় কৰাত এক গুৰুত্বপূৰ্ণ ভূমিকা পালন কৰা আওৰ মৃত্যুত শোকৰ ছাঁ পৰিছে নাগালেণ্ডত। ৰাজ্যখনৰ মুখ্যমন্ত্ৰী নেইফিউ ৰিঅ’ৱে টেমচুলা আওৰ মৃত্যুত শোকপ্ৰকাশ কৰি পৰিয়াললৈ সমবেদনা জনায়।
প্ৰথতিযশা সাহিত্যিক গৰাকীৰ মৃত্যুত নগা সমাজে এগৰাকী পৰামৰ্শদাতা তথা অভিভাৱক হেৰুৱাইছে আৰু তেওঁৰ অনুপস্থিতিৰ ফলত সৃষ্টি হোৱা শূন্যতা পূৰণ কৰা কঠিন হ’ব বুলি মন্তব্য কৰি মুখ্যমন্ত্ৰী গৰাকীয়ে লগতে আওৰ আত্মাৰ সদগতি কামনা কৰে।
ইফালে প্ৰধানমন্ত্ৰী নৰেন্দ্ৰ মোদীয়েও টেমচুলা আওৰ মৃত্যুত শোক প্ৰকাশ কৰিছে। এক টুইটত মোদীয়ে আওৰ শিক্ষা, সাহিত্য আৰু সাংস্কৃতিক কৃতিৰ সোঁৱৰণ কৰি তেওখেতৰ আত্মাৰ চিৰশান্তি কামনা কৰে আৰু আওৰ পৰিয়াল তথা আত্মীয়সকললৈ সমবেদনা জ্ঞাপন কৰে।
উল্লেখ্য যে নাগালেণ্ড মহিলা আয়োগৰ অধ্যক্ষ হিচাপে কাৰ্যনিৰ্বাহ কৰা টেমচুলা আওক ২০০৭ চনত ভাৰতৰ চতুৰ্থ সৰ্বোচ্চ অসামৰিক সন্মান পদ্মশ্ৰীৰে সন্মানিত কৰা হৈছিল।
তেখেতে নৰ্থ ইষ্টাৰ্ন হিল ইউনিভাৰচিটি, চমুকৈ নেহু-ৰ ইংৰাজী বিভাগৰ অধ্যাপিকা হিচাপেও কাৰ্যনিৰ্বাহ কৰিছিল। ২০০৯ চনত মেঘালয়ৰ ৰাজ্যপালৰ সোণৰ পদক লাভ কৰা আও- এ ২০১৩ চনত সাহিত্য অকাডেমি বঁটা লাভ কৰিছিল।
