শেহতীয়াকৈ নাগপুৰৰ এগৰাকী মহিলাৰ এক চাঞ্চল্যকৰ ঘটনা পোহৰলৈ আহিছে। তেওঁ এজন এজনকৈ পুৰুষক প্ৰতাৰণা কৰা ঘটনা পোহৰলৈ অহাৰ লগে লগে গোটেই অঞ্চলটোত তোলপাৰ লাগে। খবৰ অনুসৰি তেওঁ ভুৱা পৰিচয়েৰে বহু পুৰুষক বিয়া কৰাইছিল আৰু তেওঁলোকৰ পৰা একাধিকবাৰ বৃহৎ পৰিমাণৰ ধন আদায় কৰিছিল।
সূত্ৰৰ পৰা জানিব পৰা মতে, অভিযুক্ত মহিলাগৰাকীৰ নাম ছামীৰা ফাতিমা। তেওঁ এগৰাকী শিক্ষয়িত্ৰী বুলি জনা গৈছে। অভিযোগ অনুসৰি যোৱা ১৫ বছৰত কমেও আঠজন পুৰুষক বিয়া কৰাইছে। চলিত বৰ্ষৰ ২৯ জুলাইত নাগপুৰৰ এখন চাহৰ দোকানৰ পৰা তেওঁক হাতেলোটে গ্ৰেপ্তাৰ কৰা হয়।
সৰ্বভাৰতীয় সংবাদ মাধ্যমৰ সূত্ৰ অনুসৰি, নৱমজন সম্ভাৱ্য চিকাৰক ফান্দত পেলাবলৈ গৈছিল। সেই সময়তে অভিযুক্ত মহিলাগৰাকী আৰক্ষীৰ হাতত ধৰা পৰে। আৰক্ষীয়ে জনোৱা মতে, ছামীৰা ফাতিমা এটা বিশেষ সংগঠনৰ সৈতে জড়িত। মূলতঃ প্ৰভাৱশালী আৰু বিবাহিত মুছলমান পুৰুষক ব্লেকমেইলিং কৰিবলৈ তেওঁলোকে বিবাহক ‘মাধ্যম’ হিচাপে ব্যৱহাৰ কৰিছিল। তাৰ পিছত তেওঁলোকৰ পৰা টকা সংগ্ৰহ কৰিছিল।
জনা যায় যে এই ছামীৰাই আগতে বিভিন্ন বৈবাহিক ৱেবছাইট আৰু ফেচবুকৰ দৰে ছ’চিয়েল মিডিয়া ব্যৱহাৰ কৰি নিজৰ চিকাৰ বিচাৰি পাইছিল। বহু সময়ত তেওঁ নিজকে এটা সন্তানৰ মাতৃ আৰু বিবাহ বিচ্ছেদ হোৱা বুলি পৰিচয় দিছিল। ইয়াৰ লগতে তেওঁ ভুৱা কাহিনী কৈ সহানুভূতি আৰু বিশ্বাস অৰ্জন কৰিছিল।
কোনোবা এটা পৰ্যায়ত আস্থা লাভ কৰাৰ পিছত তেওঁ সেই মানুহবোৰৰ লগত ‘নিকাহ’ সম্পন্ন কৰিছিল। তেতিয়াই কাহিনীটোত নতুন টুইষ্ট এটা আৰম্ভ হ’ব। পিছলৈ ছামীৰাই তেওঁলোকৰ বিৰুদ্ধে আইনী ব্যৱস্থা, সামাজিক অপমানৰ ভাবুকি বা কেতিয়াবা অভিযোগৰ জৰিয়তে বৃহৎ পৰিমাণৰ ধন দাবী কৰে। তেওঁ কেতিয়াবা বেংকৰ জৰিয়তে এই ধন সংগ্ৰহ কৰিছিল। কেতিয়াবা নগদ ধনৰ লেনদেন কৰে৷
এজন অভিযোগকাৰীয়ে কয় যে ছামীৰাই এজন ব্যক্তিৰ পৰা প্ৰায় ৫০ লাখ টকা আৰু আন এজনৰ পৰা ১৫ লাখ টকা সংগ্ৰহ কৰিছিল। সংবাদ মাধ্যমৰ সূত্ৰ অনুসৰি এই অভিযোগকাৰীসকলৰ ভিতৰত ৰিজাৰ্ভ বেংকৰ এজন উচ্চ পদস্থ বিষয়াও আছে। আৰক্ষীৰ অনুমান অনুসৰি সংগ্ৰহ কৰা মুঠ ধন ইয়াতকৈ বহু বেছি হ’ব পাৰে।
আৰক্ষী সূত্ৰৰ মতে, ছামীৰাই পূৰ্বেও চতুৰতাৰে গ্ৰেপ্তাৰৰ পৰা হাত সাৰিছিল। এইটোৱে শেষ নহয়! এটা সময়ত তেওঁ আনকি গৰ্ভৱতী বুলি দাবী কৰি আইনৰ চকুত ফাঁকি দিছিল। অৱশেষত শেহতীয়াকৈ নাগপুৰৰ এখন চাহৰ দোকানত নতুন ফান্দ পাতি থকাৰ সময়তে আৰক্ষীয়ে তেওঁক চিনাক্ত কৰে। তাৰ পাছত গ্ৰেপ্তাৰ কৰিবলৈ সক্ষম হয়।
সম্প্ৰতি আৰক্ষীয়ে জনোৱা মতে, সমগ্ৰ গেঙটোৱে কেনেদৰে কাম কৰিছিল আৰু ইয়াৰ লগত আৰু কোন জড়িত আছিল সেই বিষয়ে জানিবলৈ তদন্ত চলি আছে। ছামীৰাক জেৰা কৰা হৈছে। জেৰা চলি আছে। অতি সোনকালে তেওঁৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।
