যি সময়ত চৰকাৰে প্লাষ্টিকৰ বেগ ব্যৱহাৰত নিষেধাজ্ঞা ঘোষণা কৰিছে, প্লাষ্টিকৰ বিৰুদ্ধে পৰিৱেশ প্ৰদূষণ সম্পৰ্কীয় সজাগতা সৃষ্টি কৰি অহা হৈছে, সেই সময়তে নলবাৰী জিলাৰ লাৰকুছিত এজন যুৱকে শিক্ষালব্ধ প্ৰযুক্তিৰ অবিহনেই পেলনীয়া প্লাষ্টিকৰ সামগ্ৰীৰে বিকল্প ইন্ধন প্ৰস্তুত কৰাৰ দাবী কৰিছে।
যুৱকজনৰ এই উদ্ভাৱনে অঞ্চলটোৰ সকলোৰে দৃষ্টি আকৰ্ষণ কৰাৰ লগতে বহুতৰ মনত উৎসুকতা সৃষ্টি কৰিবলৈ সক্ষম হৈছে।
এই বিৰল প্ৰযুক্তি কৌশল উদ্ভাৱন কৰা বুলি দাবী কৰা খুৰচেদ আহমেদ(৩০) পেচাত এজন কাঠমিস্ত্ৰী। তেওঁৰ দাবী, আজিৰ পৰা এমাহমান আগতে পেলনীয়া প্লাষ্টিকৰ পৰা পেট্ৰ’ল জাতীয় ইন্ধন প্ৰস্তুত কৰাৰ আচৰিত চিন্তাটো তেওঁৰ মনলৈ আহিছিল।
চিন্তা মতেই তেওঁ চুবুৰীয়া দুজন বন্ধুক লগত লৈ আৰম্ভ কৰিলে পেলনীয়া প্লাষ্টিক সামগ্ৰী গোটোৱা কাম, পিছত গোটখোৱা প্লাষ্টিকসমূহ এটি বন্ধ ড্ৰামত উতলাই তেওঁ বিকল্প ইন্ধন প্ৰস্তুত কৰি উলিয়ায়, আহমেদৰ দাবী।
এমাহজোৰা প্ৰচেষ্টাৰ অন্তত যোৱা দুদিনত তেওঁ পৰীক্ষামূলকভাৱে প্ৰস্তুত কৰা ইন্ধন বাইক আৰু টেম্প’ত ব্যৱহাৰ কৰি সফলতা লাভ কৰে বুলিও তেওঁ দাবী কৰিছে।
উল্লেখযোগ্য যে আজি নৰ্থ-ইষ্ট নাওৰ সাংবাদিকক তেওঁ প্লাষ্টিক উতলাই প্ৰস্তুত কৰা ইন্ধন বাইকত ব্যৱহাৰ কৰি দেখুৱায়।
খুৰচেদৰ উক্ত উদ্ভাৱন চাবলৈ তেওঁৰ ঘৰত স্থানীয় লোকে ভিৰ কৰাও দেখা গৈছে। বিভিন্নজনে তেওঁৰ এই প্ৰচেষ্টাক প্ৰশংসা কৰাৰ লগতে এইক্ষেত্ৰত চৰকাৰ তথা প্ৰশাসনৰ ফালৰ পৰা যুৱকজনক সহায় কৰাৰ কামনা কৰে।
