যিটো সময়ত অসমৰ পুৰণি আঞ্চলিক ৰাজনৈতিক দল অসম গণ পৰিষদে অকলে নিৰ্বাচনত অৱতীৰ্ণ হোৱাৰ ভয়ত মিত্ৰতা বিচাৰি হাবাথুৰি খাইছে তেনে সময়ত অসমৰ ৰাজনীতিত ভৰি থৈয়ে নেশ্যনেল পীপ’লছ পাৰ্টি চমুকৈ এন পি পিয়ে আগন্তুক লোকসভা নিৰ্বাচনত অসমৰ ১৪ টা সমষ্টিতে প্ৰতিদ্বন্দ্বিতা আগবঢ়াব বুলি সদম্ভে ঘোষণা কৰে।
আজি গুৱাহাটী প্ৰেছ ক্লাৱত অনুষ্ঠিত এক সংবাদমেলত এই সিদ্ধান্তৰ কথা ৰাজহুৱা কৰে। এতিয়ালৈ নিৰ্বাচনত অৱতীৰ্ণ হ’বলগীয়া প্ৰাৰ্থীৰ তালিকা চূড়ান্ত হোৱা নাই যদিও এই ক্ষেত্ৰত বিচাৰ-বিবেচনা চলি আছে বুলি সংবাদ মাধ্যমৰ আগত প্ৰকাশ কৰে দলটোৰ অসমৰ নেতা দিলীপ বৰাই। ২২ অথবা ২৩ মাৰ্চত দলে প্ৰাৰ্থীৰ চূড়ান্ত তালিকা ঘোষণা কৰিব।
আনহাতে, উত্তৰ-পূৰ্বাঞ্চলৰ ২৫ খন আসনতে প্ৰাৰ্থিত্ব আগবঢ়াব বুলি এন পি পিয়ে ঘোষণা কৰি দলটোৱে ২৫ খন আসনৰ ভিতৰত অতিকমেও ১০ খনত বিজয়ী হ’ব বুলি আত্মবিশ্বাসী।
সমগ্ৰ উত্তৰ-পূৰ্বাঞ্চলক এক কৰা, নিৱনুৱা সমস্যা সমাধান কৰা, উত্তৰ-পূৰ্বাঞ্চলত ঔদ্যোগিক বিকাশ বৃদ্ধি কৰা, সাতখন ৰাজ্যৰ যুৱক-যুৱতীসকলৰ মাজত দক্ষতা বৃদ্ধি কৰা আদি বিষয়বোৰ দলটোৰ মূল নিৰ্বাচনী ইচ্ছ্যু হ’ব বুলি সংবাদ মেলত উল্লেখ কৰে।
উত্তৰ-পূৰ্বাঞ্চলৰ জনসাধাৰণ অস্তিত্বৰ প্ৰতি ভাবুকি আনিব পৰা নাগৰিকত্ব বিধেয়ক এন পি পিয়ে সদাই বিৰোধিতা কৰি যাব বুলিও কয়।
উল্লেখযোগ্য যে, নাগৰিকত্ব সংশোধনী বিধেয়কৰ সময়ত অসমৰ জনসাধাৰণৰ পক্ষত থাকি বিধেয়ক বিৰোধী সবল ভূমিকা পালন কৰি অসমৰ জনসাধাৰণৰ নয়নৰ মণি হোৱা মেঘালয়ৰ মুখ্য মন্ত্ৰী কনৰাড চাংমা নেতৃত্বাধীন নেশ্যনেল পীপ’লছ পাৰ্টিৰ অসম গোট ৬ মাৰ্চত আনুষ্ঠানিক ভাবে উদ্বোধন কৰিছিল কনৰাড চাংমাই।
