হকীৰ যাদুকৰখ্যাত মেজৰ ধ্যানচান্দৰ ১১৩ সংখ্যক জন্মদিৱস উপলক্ষে দেশৰ বিভিন্ন প্ৰান্তৰ লগতে অসমৰ শিলচৰতো বিভিন্ন কাৰ্যসূচীৰ মাজেৰে পালন কৰা হয় ৰাষ্ট্ৰীয় ক্ৰীড়া দিৱস।
হকী খেলৰ সম্ৰাট তথা হকীৰ যাদুকৰখ্যাত ধ্যানচান্দক শ্ৰদ্ধাঞ্জলি জনোৱাৰ উদ্দেশ্যে শিলচৰ জিলা ক্ৰীড়া সন্থাৰ উদ্যোগত আজি এক সমদল উলিওৱা হয়। জিলা খেলপথাৰৰ পৰা বাহিৰ কৰা সমদলটোত বিভিন্ন অঞ্চলৰ প্ৰায় ২০০ৰো অধিক ক্ৰীড়াবিদে অংশ লোৱা পৰিলক্ষিত হয়।
ইয়াৰ উপৰি শিলচৰ জিলা ক্ৰীড়া সন্থাৰ উদ্যোগত জিলা ক্ৰীড়া সন্থা সভাপতি একাদশ আৰু জিলা ক্ৰীড়া সন্থা সম্পাদক একাদশৰ মাজত এখন প্ৰীতি হকী মেচৰো আয়োজন কৰা বুলি জানিবলৈ দিয়ে।
ৰাষ্ট্ৰীয় ক্ৰীড়া দিৱস উপলক্ষে আয়োজন কৰা বিভিন্ন কাৰ্যসূচী সন্দৰ্ভত জিলা ক্ৰীড়া সভাপতি বাবুল হ’ৰে নৰ্থ-ইষ্ট নাওৰ আগত কয়, ‘হকীৰ যাদুকৰ ধ্যানচান্দৰ জন্মদিনৰ দিনা আমি সকলোৱে আজিৰ দিনটো ৰাষ্ট্ৰীয় ক্ৰীড়া দিৱস হিচাপে উদযাপন কৰি আহিছো। আজিৰ প্ৰজন্মই প্ৰয়াত মেজৰ ধ্যানচান্দৰ বিষয়ে বিশেষ একো নাজানে। সেয়ে এনেকুৱা অনুষ্ঠানৰ জৰিয়তে তেওঁৰ বিষয়ে নৱপ্ৰজন্মক জনোৱাৰ এক মাধ্যম হ’ব’।
আনহাতে শিলচৰ জিলা ক্ৰীড়া সন্থাৰ সাধাৰণ সম্পাদক সুবিমল ধৰে কয় যে আজিৰ এই বিশেষ দিনটো উদযাপন কৰাৰ উদ্দেশ্যে আমি আয়োজন কৰা হকী মেচখনত ল’ৰা আৰু ছোৱালী উভয়ে অংশগ্ৰহণ কৰা পৰিলক্ষিত হৈছে। এনে কৰাৰ একমাত্ৰ কাৰণ হৈছে যে ল’ৰাতকৈ ছোৱালীৰ দক্ষতা কোনো গুণে কম নহয় আৰু ছোৱালীসকলেও ভবা উচিত যে ল’ৰাতকৈ তেওঁলোকৰ প্ৰতিভা কম নহয়।
ইয়াৰ উপৰি ৰাষ্ট্ৰীয় ক্ৰীড়া দিৱসৰ লগত সংগতি ৰাখি শিলচৰ ক্ৰীড়া সন্থাৰ উদ্যোগত অনুষ্ঠিত হ’বলগীয়া ৰামানুজ গুপ্তা সোঁৱৰণী ছুপাৰ ডিভিজন ফুটবল লীগখনো আজি সন্ধিয়াৰ পৰা আৰম্ভ হ’ব বুলি সুবিমল ধৰে জানিবলৈ দিয়ে।
