আজি ল’কডাউনৰ চতুৰ্থটো দিনত নাজিৰাত প্ৰশাসনৰ নিয়ম উলংঘা কৰা ছজন ব্যক্তিক আৰক্ষীয়ে আটক কৰি জেললৈ প্ৰেৰণ কৰে।
ক’ৰ’না ভাইৰাছৰ সংক্ৰমণ ৰোধৰ বাবে প্ৰধান মন্ত্ৰী নৰেন্দ্ৰ মোদীয়ে দেশজুৰি ২১দিনীয়া সম্পূৰ্ণ ল’কডাউন ঘোষণা কৰিছিল। প্ৰধান মন্ত্ৰীৰ এই ল’কডাউনক ভেঙুচালি কৰি বিনা কাৰণত বাহিৰত ঘুৰি ফুৰাসকলৰ বিৰুদ্ধে এতিয়া কঠোৰ হৈছে আৰক্ষী প্ৰশাসন।
আজি নাজিৰাত চতুৰ্থ দিনা ল’কডাউন ভংগ কৰা ৬জনকৈ ব্যক্তিক আৰক্ষীয়ে আটক কৰি জে’ললৈ প্ৰেৰণ কৰাৰ লগতে তেওঁলোকৰ পৰা তিনিখনকৈ মটৰ চাইকেলো জব্দ কৰে।
আটক হোৱাসকলৰ দুজনৰ ঘৰ বঙাইগাঁও জিলাত।
ল’কডাউন উলংঘা কৰি জে’ললৈ যোৱা লোককেইজন হৈছে – নাজিৰাৰ মাদুৰী গোহাঁই গাঁৱৰ উমেছ মাৰাৰ (২৫), নাজিৰা কেতেকীবাৰী চুলেমান আলি (৩৩), মেজেঙাৰ দিলৱাৰ আহমেদ (৩৩), মনচুৰ হুছেইন (৩৩), বঙাইগাঁৱৰ অভয়াপুৰীৰ ৰাজিবুল ইছলাম আৰু বঙাইগাঁৱৰ ইমদাদুল ইছলাম (২৮)।
লোককেইজনক নাজিৰা আদৰ্শ আৰক্ষী থানাই আটক কৰে। ৰাইজলৈ নাজিৰা প্ৰশাসনৰ আহ্বান যাতে কোনেও ল’কডাউনৰ নীতি-নিয়ম ভংগ নকৰে।
