ভাৰতৰ গোল্ডেন বয় নীৰজ চোপ্ৰাই তিনিদিনৰ ভিতৰত পুনৰ শ্ৰেষ্ঠৰ খিতাপ অৰ্জন। পেৰিছ ডাইমণ্ড লীগৰ পিছত এইবাৰ অষ্ট্ৰাভা গোল্ডেন স্পাইক জয় কৰিলে ভাৰতীয়া এথলিট নীৰজ চোপ্ৰাই। এই প্ৰতিযোগিতাখনত নীৰজে সৰ্বোচ্চ ৮৫.২৯ মিটাৰ দূৰত্বলৈ জেভেলিন নিক্ষেপ কৰিছিল। শ্ৰেষ্ঠ প্ৰদৰ্শন কৰিব নোৱাৰিলেও ভাৰতৰ গোল্ডেন বয়ে শ্ৰেষ্ঠৰ খিতাপ দখল কৰে।
যোৱা মাহত দোহা ডাইমণ্ড লীগত ভাৰতৰ গোল্ডেন বয়ে প্ৰথমবাৰৰ বাবে ৯০ মিটাৰৰ সীমা অতিক্ৰম কৰিছিল। কিন্তু শ্ৰেষ্ঠৰ খিতাপ তেওঁৰ পৰা আঁতৰত থাকিল। যোৱা শুকুৰবাৰে নিশা তেওঁ পেৰিছ ডাইমণ্ড লীগৰ শ্ৰেষ্ঠৰ খিতাপ লাভ কৰে। তেওঁ সৰ্বোচ্চ জেভেলিন ৮৮.১৬ মিটাৰ দূৰত্বলৈ নিক্ষেপ কৰে। তাৰ পিছত মঙলবাৰে ২৪ জুনত অষ্ট্ৰাভা গোল্ডেন স্পাইকত ৮৫.২৯ মিটাৰ দূৰত্বলৈ জেভেলিন নিক্ষেপ কৰা প্ৰথমজন খেলুৱৈ হিচাপে পৰিগণিত হয় আৰু বিজয়ীৰ খিতাপ অৰ্জন কৰে।
মেচ খনৰ তৃতীয়টো নিক্ষেপত নীৰজে ৮৫.২৯ মিটাৰ জেভেলিন নিক্ষেপ কৰে। তেওঁ মুঠ চাৰিটা সফল থ্ৰ’ কৰিছিল। তথাপিও ৮৫.২৯ মিটাৰ থ্ৰ’টো প্ৰতিযোগিতাৰ সৰ্বোত্তম প্ৰদৰ্শন হিচাপে পৰিগণিত হয়। দক্ষিণ আফ্ৰিকাৰ ডু স্মিথে ৮৪.১২ মিটাৰ থ্ৰ’ কৰি দ্বিতীয় স্থান লাভ কৰে। এই ছিজনত নিজক উন্নত কৰাৰ লক্ষ্যৰে খেলি থকা নীৰজে এতিয়া টকিঅ’ত অনুষ্ঠিত হ’বলগীয়া বিশ্ব চেম্পিয়নশ্বিপৰ বাবে পূৰ্ণ উদ্যমেৰে প্ৰস্তুতি চলাইছে। ১৩ ছেপ্টেম্বৰত আৰম্ভ হ’বলগীয়া এই প্ৰতিযোগিতা ২১ ছেপ্টেম্বৰত সমাপ্ত হ’ব।
