নেপালৰ ৰাজনৈতিক পৰিস্থিতি চূড়ান্ত পৰ্যায়ত উপনীত হৈছে। প্ৰধানমন্ত্ৰী কে পি শৰ্মা অলিৰ পদত্যাগৰ পিছত সেনাই নেপালৰ শাসন ব্যৱস্থা গ্ৰহণ কৰে।
ইতিমধ্যে সমগ্ৰ দেশতে কাৰ্ফিউ জাৰি কৰা হৈছে, সেনাই ৰাজপথত টহল দিছে। নতুন চৰকাৰ গঠন নোহোৱালৈকে দেশৰ প্ৰশাসনিক দায়িত্ব চম্ভালিব বুলি সেনাই প্ৰকাশ কৰিছে।
ছাত্ৰ আৰু যুৱ আন্দোলনৰ বাবে সোমবাৰ আৰু মঙলবাৰৰ পৰা কাঠমাণ্ডুত আৰম্ভ হোৱা প্ৰতিবাদ ক্ষীপ্ৰতাৰে সমগ্ৰ নেপালত বিয়পি পৰে। প্লেকাৰ্ড হাতত লৈ শ্লোগান চিঞৰি হাজাৰ হাজাৰ প্ৰতিবাদকাৰীয়ে সংসদ ভৱন, মন্ত্ৰীসকলৰ বাসগৃহ আনকি উচ্চতম ন্যায়ালয়তো জুই লগাই দিয়ে।
এই অশান্তিৰ সুযোগ লৈ নেপালৰ বিভিন্ন কাৰাগাৰত বিদ্ৰোহৰ সূচনা হয়। বাংকে জিলাৰ সংশোধনী কেন্দ্ৰৰ পৰা কাৰাবন্দীসকলে পলাবলৈ চেষ্টা কৰাত আৰক্ষীৰ গুলীচালনাত ৫জন লোক নিহত হোৱাৰ লগতে ৭জন আহত হয়। চিকিৎসালয়ৰ চিকিৎসকে জনোৱা মতে, আহত একাংশৰ অৱস্থা সংকটজনক।
খবৰ অনুসৰি বাংকে আৰু পোখৰাণ কাৰাগাৰৰ পৰা প্ৰায় ১৬০০ কয়দী পলায়ন কৰিছে। সেনা-আৰক্ষীৰ যুটীয়া বাহিনীয়ে পৰিস্থিতি নিয়ন্ত্ৰণলৈ অনাৰ চেষ্টা চলাইছে। ৰাজধানী কাঠমাণ্ডুকে ধৰি স্পৰ্শকাতৰ অঞ্চলত সেনা মোতায়েন কৰা হৈছে।
মঙলবাৰে নিশা সেনা প্ৰধান অশোক ৰাজ ছিগডেলে প্ৰতিবাদকাৰীৰ প্ৰতিনিধিৰ সৈতে এক বৈঠকত মিলিত হয়। সেনা প্ৰধানজনে জানিব বিচাৰিছিল তেওঁলোকৰ মূল দাবী আৰু উদ্দেশ্য। ৰাষ্ট্ৰপতি ৰামচন্দ্ৰ পৌডেল আৰু প্ৰতিবাদকাৰীৰ প্ৰতিনিধিৰ মাজত মধ্যস্থতা কৰিব সেনাই।
