ভাৰত-চীনৰ মাজত চলি থকা সংঘাতৰ মাজতে নেপালে বৃহস্পতিবাৰে ভাৰতৰ ভূখণ্ডক সামৰি লোৱা নতুন বিতৰ্কিত ৰাজনৈতিক প্ৰশাসনিক মানচিত্ৰখন গৃহীত কৰে।
এই পদক্ষেপে ভাৰতৰ সৈতে সীমা বিবাদ অধিক ঘণীভূত কৰি তুলিলে।
নতুন মানচিত্ৰ সংশোধনী বিধেয়কখনত কৌশলগতভাৱে ভাৰতৰ বাবে গুৰুত্বপূৰ্ণ ভূখণ্ড কালাপানী, লিপুলেখ আৰু লিম্পিয়াধূৰাক নেপালৰ ভূখণ্ডৰ ভিতৰত সামৰি লোৱা হৈছে।
যোৱা শনিবাৰে নেপালৰ সংসদৰ নিম্ন সদনত বিধেয়কখন গৃহীত হোৱাৰ পাছত বৃহস্পতিবাৰে উচ্চ সদনত সেইখনত গৃহীত কৰাৰ পথ প্ৰশস্ত হৈছিল।
নেপালৰ উচ্চ সদনে নতুন বিধেয়কখন ৫৭টা ভোটৰ সমৰ্থনেৰে সৰ্বসন্মতিক্ৰমে গৃহীত কৰে।
নেপালৰ ৰাষ্ট্ৰপতিয়ে এতিয়া বিধেয়কখনত তেওঁৰ স্বাক্ষৰ কৰিব।
ভাৰত চৰকাৰে যোৱা সপ্তাহত ইয়াক সীমা উলংঘা তথা এই দাবীক এক কৃত্ৰিম সম্প্ৰসাৰণ বুলি অভিহিত কৰিছিল।
‘’এই কৃত্ৰিম সম্প্ৰসাৰণৰ দাবী ঐতিহাসিক তথ্য বা প্ৰমাণৰ ওপৰত প্ৰতিষ্ঠিত নহয় তথা যুক্তিসিদ্ধ নহয়। ই লগতে সীমান্ত সমস্যাক লৈ আলোচনা অনুষ্ঠিত কৰাৰ আমাৰ বৰ্তমান বুজাবুজিকো উলংঘা কৰিছে,’’-চৰকাৰী মুখপাত্ৰগৰাকীয়ে এইদৰে কৈছিল।
