ৰাজ্যত লোকসভা নিৰ্বাচনৰ গৰম বতাহ বলি থকাৰ সময়ছোৱাত ৰাজ্যত বিভিন্ন প্ৰতিশ্ৰুতি লৈ আবিৰ্ভাৱ হৈছে নতুন নতুন ৰাজনৈতিক দলৰ। তাৰ সমান্তৰালকৈ নতুন নতুন প্ৰতিশ্ৰুতিৰ বন্যাৰে বিজেপি-কংগ্ৰেছৰ দৰে নতুনকৈ গঠন হোৱা দলসমূহে ভোটাৰক আকৰ্ষণ কৰাৰ কৌশল হাতত লোৱাটো পৰিলক্ষিত হৈছে।
২০১৭ চনতে গঠন হোৱা বুলি দাবী কৰা তেনে এক নতুন ৰাষ্ট্ৰীয় দল ‘হিন্দুস্তান কংগ্ৰেছ’এ অসমত আগন্তুক লোকসভা নিৰ্বাচনত প্ৰত্যেকটো সমষ্টিতে প্ৰাৰ্থিত্ব প্ৰদান কৰাৰ কথা ঘোষণা কৰে।
আজি মহানগৰীৰ পানবজাৰস্থিত হোটেল মিনাৰভাত এক সংবাদমেল সম্বোধন কৰি সংগঠনটোৰ ৰাজ্যিক উপ-সভাপতি বসন্ত শৰ্মাই ঘোষণা কৰে এই কথা।
সংবাদমেলত শৰ্মাই কয় ‘আমাৰ নিৰ্বাচনৰ মূল ইচ্ছ্যু হ’ব বিদেশী সমস্যাৰ সমাধান। নাগৰিকত্ব সংশোধনী বিধেয়কৰ আমি সম্পূৰ্ণ বিৰোধী।‘ ৰাজ্যসভাত জাতিধ্বংসী বিধেয়কখন গৃহীত হোৱাহেঁতেন উচ্চতম ন্যায়ালয়ৰ কাষ চাপি হ’লেও বিধেয়কখন নাকচ কৰিলেহেঁতেন বুলি সংবাদমেলত উপ-সভাপতিগৰাকীয়ে দাবী কৰে।
কংগ্ৰেছ আৰু বিজেপিৰ আমোলত দুয়োখন চৰকাৰৰ আমোলতে জনসাধাৰণ অতিষ্ঠ হৈ পৰা বুলি মন্তব্য কৰি শৰ্মাই লগতে কয় ‘প্ৰতিখন চৰকাৰৰ অপ-শাসনত অতীষ্ঠ হৈ ৰাইজ এতিয়া বিক্লপৰ সন্ধানত। সেই বিকল্পৰ চিন্তাৰে গঠিত হোৱা আমাৰ দলে জনসাধাৰণৰ সেৱক ৰূপে কাম কৰি যোৱাৰ মানসেৰে নিজকে ৰাইজৰ বাবে উসৰ্গিত কৰিছে।‘
তাৎপয্যপূৰ্ণভাৱে বানপানী আৰু গৰাখহনীয়াক ৰাষ্ট্ৰীয় সমস্যাৰূপে গ্ৰহণ কৰি ইয়াৰ স্থায়ী সমাধান কৰাটোও তেওঁলোকৰ এক পদক্ষেপ বুলি সংবাদমেলত উল্লেখ কৰে।
তাৰোপৰি তেওঁলোকৰ অন্যান্য প্ৰতিশ্ৰুতিসমূহ ক্ৰমে ‘দেশৰ কৃষিক্ষেত্ৰৰ উন্নয়ন আৰু কৃষক শ্ৰমিকৰ সমস্যা সমাধান, প্ৰকৃত ভূমিহীন ভাৰতীয় নাগৰিকক ভূমিপট্টা প্ৰদান, ছয় জনগোষ্ঠীক জনজাতিকৰণ, সংবাদকৰ্মীৰ সমস্যা সমাধান ইত্যাদি।‘
সংবাদমেলত তেওঁলোকৰ দলীয় প্ৰতীক চিহ্ন ‘কৃষকৰ ট্ৰেক্টৰ’ বুলি উপ-সভাপতিগৰাকীয়ে জানিবলৈ দিয়ে।
অৱশ্যে বৰ্তমানলৈকে ধুবুৰী লোকসভা সমষ্টিতহে প্ৰাৰ্থীত্ব থিৰাং কৰিছে দলটোৱে। ধুবুৰী লোকসভা সমষ্টিৰ পৰা সংগঠনটোৰ সাধাৰণ সম্পাদক গোলাম নবী আজাদক প্ৰাৰ্থীত্ব প্ৰদান কৰিছে। প্ৰত্যেকটো সমষ্টিৰ পৰা দুই-তিনিখনকৈ প্ৰাৰ্থীত্বৰ আবেদন আহিছে যদিও কাইলৈহে সকলো সমষ্টিৰ প্ৰাৰ্থীৰ তালিকা প্ৰকাশ কৰিব ৰাজনৈতিক দলটোৱে।
