ৰঙালী বিহুলৈ মাজত মাথোঁ এমাহ এপষেক বাকী। যোৱাবাৰৰ দৰে এইবাৰো ৰঙালী বিহুৰ অনুষ্ঠানক লৈ নতুন SOP লৈ সাংবাদিকৰ সমুখত উপস্থিত হিমন্ত বিশ্ব শৰ্মা। অসমীয়াই কেনেকৈ বিহুৰ আয়োজন কৰিব সেয়া নিৰ্ধাৰণ কৰি দিব মুখ্যমন্ত্ৰী হিমন্ত বিশ্ব শৰ্মাই।
মঙলবাৰে সংবাদ মেল যোগে মুখ্যমন্ত্ৰী ড০ হিমন্ত বিশ্ব শৰ্মাই ৰঙালী বিহু অনুষ্ঠান আয়োজনৰ সমিতিৰ বাবে এখন নতুন SOP ঘোষণা কৰিছে। এইবাৰ ৰাজ্যৰ বিহু অনুষ্ঠানৰ কমিটিয়ে কাৰোৰে পৰা দাবী কৰিব নোৱাৰিব চান্দা। কোনোবাই নিজ ইচ্ছাৰে দিলে বৰঙণি ল’ব পাৰিব কমিটি সমূহে। ইয়াৰ পৰিবৰ্তে প্ৰত্যেকখন বিহু সমিতিলৈ হিমন্ত বিশ্ব শৰ্মাই আগবঢ়াব ১.৫০ লাখ টকাকৈ সাহাৰ্য। অৱশ্যে মে মাহৰ ১৫ তাৰিখৰ পিছত বিহু অনুষ্ঠান পতা কমিটি সমূহে নাপাব এই চৰকাৰী বৰঙণি।
এতিয়া প্ৰশ্ন উত্থাপন হৈছে যে ৰাজ্যৰ মন্দ অৰ্থনীতি টনকিয়াল কৰাৰ সলনি কোটি কোটি টকাৰ ধাৰ লৈ চৰকাৰে ৰাজ্যৰ বিহু কমিটি সমূহলৈ এইদৰে বৰঙণি আগবঢ়োৱাৰ কাৰণ কি? অসমীয়াই অতীজৰে পৰা স্বকীয় আৰু মুক্তভাবে অনুষ্ঠিত কৰি অহা হেঁপাহৰ বিহুটিত চৰকাৰী হস্তক্ষেপ কিয়? বাপটিসাহোন বিহুটি ৰাইজে কেনেদৰে পালন কৰিব সেয়াও কিয় নিৰ্ধাৰণ কৰি দিব বিচাৰিছে হিমন্ত বিশ্ব শৰ্মাৰ চৰকাৰে? ৰাজ্যৰ সচেতন মহলৰ মাজত এই সমূহ প্ৰশ্নই এতিয়া গা কৰি উঠিছে।
