বিশেষ তদন্তকাৰী দল বা এছ আই টিয়ে কৰ্ণাটকৰ মন্দিৰ চহৰ ধৰ্মস্থলত গণ সমাধিৰ গোচৰৰ তদন্ত অব্যাহত ৰাখিছে। সূত্ৰ অনুসৰি সোমবাৰে নতুনকৈ হাড়-মূৰ উদ্ধাৰ হৈছে। সূত্ৰ অনুসৰি ১১ টা স্থানৰ পৰা হাড়-মূৰ উদ্ধাৰ কৰা হৈছে। এটা মানৱ কংকালো উদ্ধাৰ কৰা হৈছে।
যোৱা কেইদিনমানৰ পৰা মন্দিৰত সংঘটিত হোৱা গণ সমাধিৰ গোচৰৰ তদন্তত ইটোৰ পিছত সিটো চাঞ্চল্যকৰ তথ্য পোহৰলৈ আহিছে। ইপিনে, সোমবাৰে এজন সমাজ কৰ্মীয়ে এই গোচৰত নতুন বিস্ফোৰণ ঘটায়। তেওঁ এই ঘটনাৰ সাক্ষী বুলিও দাবী কৰে।
দক্ষিণ কানাড়া জিলাৰ মন্দিৰত সংঘটিত গণ সমাধিৰ গোচৰক লৈ সৃষ্টি হৈছে চাঞ্চল্য। শেহতীয়াকৈ মন্দিৰৰ এগৰাকী প্ৰাক্তন চাফাই কৰ্মীয়ে গুৰুতৰ অভিযোগ উত্থাপন কৰিছে। যোৱা ৩ জুলাইত চাফাই কৰ্মীজনে দণ্ডাধীশৰ আগত ভায্য দিছিল যে ১৯৯৮ চনৰ পৰা ২০১৪ চনৰ ভিতৰত কেইবাগৰাকীও মহিলা আৰু নাবালিকৰ মৃতদেহ সমাধিস্থ কৰি দাহ কৰা হৈছিল।
তেওঁলোকৰ বহুতৰে শৰীৰত যৌন নিৰ্যাতনৰ চিন থকা বুলিও দাবী তেওঁ লগতে কৰে। তেওঁ দক্ষিণ কানাড়াৰ আৰক্ষী অধীক্ষক আৰু ধৰ্মস্থল আৰক্ষী থানাতো এজাহাৰ দাখিল কৰে। যোৱা ৪ জুলাইত গোচৰ ৰুজু কৰা হৈছিল। ১৯ জুলাইত সিদ্দাৰামাইয়া চৰকাৰে এছ আই টি গঠনৰ নিৰ্দেশ দিছিল। ৩১ জুলাইত ধৰ্মস্থলী চহৰৰ সমীপৰ নেত্ৰাৱতী নদীৰ পাৰৰ পৰা কেইবাটাও কংকাল আৰু হাড়-মূৰ উদ্ধাৰ কৰা হৈছিল। ছাফাই কৰ্মীগৰাকীয়ে দাবী কৰিছে যে মৃতদেহ কেইটা নেত্ৰৱতী পাৰত পুতি থোৱা হৈছে।
ইপিনে, সোমবাৰে এই গোচৰে নতুন ৰূপ লাভ কৰে। দক্ষিণ কানাড়াৰ এগৰাকী সমাজকৰ্মীয়ে এছ আই টিত অভিযোগ দাঙি ধৰিছে যে ২০০২-২০০৩ চনত কোনো নিয়ম মানি নচলি কিশোৰী ছোৱালীৰ মৃতদেহ জ্বলোৱাৰ তেওঁ সাক্ষী হৈছিল। ধৰ্মস্থল অঞ্চলত কেইবাটাও দেহ সমাধিস্থ কৰা হয়।
এই তদন্ত অতি গোপনীয়তাৰে চলি আছে। আনকি হেল্পলাইন নম্বৰো আৰম্ভ কৰিছে এছ আই টিয়ে। বেলথাংগাডী আৰক্ষী থানাত মুকলি কৰা হৈছে এখন বিশেষ ডেস্ক। উদ্দেশ্য এই বিষয়ে কোনোবাই যদি কিবা জানে তেন্তে এছ আই টিক অৱগত কৰিব পাৰে।
