হিজবুল মুজাহিদিনৰ সদস্যৰ সাতজন সহযোগীক অসম আৰক্ষীয়ে গ্ৰেপ্তাৰ কৰাৰ পিছত তেওঁলোকক জেৰা কৰাৰ বাবে নেশ্যনেল ইনভেষ্টিগেশ্যন এজেন্সিৰ (নিয়া) এটা দল বুধবাৰে অসমত আহি উপস্থিত হৈছে।
ইণ্ডিয়া ডট কমত প্ৰকাশিত এটা বাতৰিত অসম আৰক্ষীৰ এগৰাকী জ্যেষ্ঠ বিষয়াৰ উদ্ধৃতিৰে কোৱা হৈছে যে, ‘’ নিয়াৰ এটা দল অসমত উপস্থিত হৈছে আৰু তেওঁলোকে গ্ৰেপ্তাৰ হোৱা লিংকমেন কেইজনক জেৰা কৰি আছে। এইবাৰ প্ৰথমবাৰৰ বাবে আমি অসমত হিজবুল মুজাহিদিনৰ লিংকমেন গ্ৰেপ্তাৰ কৰিছো। আমি চাব বিচাৰিছো যে জম্মু আৰু কাশ্মীৰৰ ইছলামিক সন্ত্ৰাসবাদীয়ে অসম ইতিমধ্যে খোপনি পুতিছিল নেকি।‘’ তদন্তৰ খাতিৰত বিষয়াজনে আৰু অধিক তথ্য প্ৰকাস কৰাৰ পৰা বিৰত থাকে।
বাতৰিটোত লগতে প্ৰকাশ কৰা হৈছে যে অসমৰ এজন বাসিন্দা হিজবুল মুজাহিদিনৰ সদস্যক উত্তৰ প্ৰদেশৰ কানপুৰৰ পৰা গ্ৰেপ্তাৰ কৰাৰ দিন চেৰেক পিছতে নিয়াৰ দলটো অসমলৈ আহে। বাতৰি অনুসৰি সন্ত্ৰাসবাদীজনে গণেশ চতুৰ্থীত অসমত আক্ৰমণৰ পৰিকল্পনা কৰিছিল। তেওঁ জেৰাত লগতে প্ৰকাশ কৰিছিল যে তেওঁ ২০১৭ চনৰ এপ্ৰিলত কাশ্মীৰলৈ প্ৰশিক্ষণৰ বাবে গৈছিল।
কমৰ উজ জামান বুলি চিনাক্ত হোৱা সদস্যজনক যোৱা সপ্তাহত উত্তৰ প্ৰদেশৰ পৰা গ্ৰেপ্তাৰ কৰাৰ পিছত অসম আৰক্ষীয়ে এতিয়ালৈকে জম্মু আৰু কাশ্মীৰৰ সন্ত্ৰাসবাদী সংগঠনটোৰ তথা ধৃত সদস্যজনৰ লগত সম্পৰ্ক থকাৰ বাবে জামানৰ ভাতৃকে ধৰি সাতজন লোকক গ্ৰেপ্তাৰ কৰিছে। জামানৰ গ্ৰেপ্তাৰৰ পিছতে অসম আৰক্ষীয়ে তেওঁৰ ঘনিষ্ঠ সহযোগী শ্বাহনৱাজ আলমক হোজাইৰ পৰা গ্ৰেপ্তাৰ কৰে। ইয়াৰ পিছতে হোজাইৰ লংকাৰ পৰা ছাইদুল আলমৰ লগতে ওমৰ ফাৰুক আৰু আনকেইজনক হোজাই আৰু নগাঁও জিলাৰ বিভিন্ন স্থানৰ পৰা গ্ৰেপ্তাৰ কৰে।
আৰক্ষীয়ে কয় যে ছাইদুলৰ জামানৰ লগত সম্পৰ্ক আছিল আৰু চলিত বছৰৰ এপ্ৰিল মাহত শ্ৰীনগৰলৈ গৈ কেইজনমান হিজবুল মুজাহিদিন সন্ত্ৰাসবাদীৰ সৈতে সম্পৰ্ক গঢ়ি তুলিছিল।
