যোৱা ১ নৱেম্বৰত তিনিচুকীয়া জিলাৰ ধলাত অচিনাক্ত দুৰ্বৃত্তই আক্ৰমণ কৰি বঙালী সম্প্ৰদায়ৰ ৫ জনকৈ লোকক হত্যা কৰাৰ ঘটনাৰ তদন্ত কৰিব ‘নিয়া’ই। ধলাৰ আক্ৰমণৰ ঘটনা সন্দৰ্ভত নিজাববীয়া গোচৰ ৰুজু কৰি কেন্দ্ৰীয় চৰকাৰৰ তদন্তকাৰী সংস্থা নেশ্যনেল ইনভেষ্টিগেশ্যন এজেঞ্চি চমুকৈ ‘নিয়া’ই তদন্ত আগবঢ়াই নিব ।
কেন্দ্ৰীয় চৰকাৰৰ নিৰ্দেশত ধলা-কাণ্ডৰ প্ৰাথমিক তদন্ত আৰম্ভ কৰা নিয়াই ইতিমধ্যে তদন্তৰ প্ৰাথমিক প্ৰতিবেদন দাখিল কৰিছে। তদন্তকাৰী সংস্থাটোৱে গুৱাহাটীৰ কাৰ্যালয়ত এই প্ৰতিবেদন দাখিল কৰিছে।
আনহাতে, নিয়াৰ সঞ্চালক যোগেশ চন্দ্ৰ মোডীয়ে প্ৰাথমিক তদন্তৰ এই প্ৰতিবেদন পৰীক্ষা কৰাৰ পাছত নিজাববীয়া গোচৰ ৰুজু কৰি তদন্ত প্ৰক্ৰিয়া আগবঢ়াই নিয়াৰ সিদ্ধান্ত লয়। অলপতে, গুৱাহাটীত দুদিনীয়া ভ্ৰমণসূচীলৈ গুৱাহাটীত উপস্থিত হোৱা সঞ্চালকগৰাকীয়ে কেন্দ্ৰীয় গৃহ মন্ত্ৰালয়ৰ অনুমোদন পালেই ধলাৰ ঘটনাৰ নিজাববীয়াকৈ গোচৰ ৰুজু কৰি নিয়াই সমস্ত ঘটনাটোৰ বিতং তদন্ত আৰম্ভ কৰিব বুলি জানিব দিয়ে।
উল্লেখ্য যে নাগৰিকত্ব সংশোধনী বিধেয়কক লৈ ৰাজ্যত প্ৰতিবাদ চলি থকাৰ সময়তে যোৱা ১ নৱেম্বৰত ধলাত বঙালী সম্প্ৰদায়ৰ লোকৰ ওপৰত দুৰ্বৃত্তই ধাৰাসাৰ গুলীবৰ্ষণ কৰি পাঁচজনকৈ লোকক হত্যা কৰিছিল।
