লকডাউনৰ প্ৰভাৱ: বিশ্বৰ আটাইতকৈ প্ৰদূষিত ২০খন চহৰৰ তালিকাত নাই ভাৰতৰ এখনো
কৰ’না ভাইৰাছৰ সংক্ৰমণ ৰোধ কৰাৰ বাবে যোৱা ২৩ মাৰ্চৰ পৰা ভাৰতত লকডাউন চলি আছে। এই সময়ছোৱাত বিভিন্ন কল-কাৰখানাৰ পৰা আৰম্ভ কৰি চৰকাৰী-বেচৰকাৰী কাৰ্যালয়, আদালত তথা যান-বাহন আদি বন্ধ আছে।
ইয়াৰ ফলত পৰিৱেশ প্ৰদূষণৰ পৰা প্ৰায় মুক্ত হৈছে দেশৰ মানুহ।পৰিণাম স্বৰূপে ভাৰতৰ চহৰবোৰত প্ৰদূষণ বহু পৰিমানে হ্ৰাস পাইছে।
এনে কাৰণতে সম্প্ৰতি বিশ্বৰ প্ৰথম আটাইতকৈ প্ৰদূষিত ২০খন চহৰৰ তালিকাত ভাৰতৰ এখনো চহৰ নাই।
শেহতীয়াকৈ IQAirৰ বৈশ্বিক বায়ু মানৰ সূচক সংক্ৰান্তীয় প্ৰদূষণ ট্ৰেকাৰৰ সমীক্ষাত এই তথ্য প্ৰকাশ পাইছে।
যোৱা ফেব্ৰুৱাৰিত IQAirৰ আন এটি সমীক্ষা প্ৰকাশ পাইছিল য’ত কোৱা হৈছিল যে বিশ্বৰ আটাইতকৈ প্ৰদূষিত চহৰৰ দুই-তৃতীয়াংশই ভাৰতৰ।
আনহাতে, যোৱা বছৰৰ সমীক্ষা অনুসৰি, বিশ্বৰ ২০খন আটাইতকৈ প্ৰদূষিত চহৰৰ ভিতৰত ১৫খনেই আছিল ভাৰতৰ।
এতিয়া এনে এক ব্যাপক পৰিৱৰ্তনৰ আঁৰত দেশজুৰি চলি থকা লকডাউনেই একমাত্ৰ কাৰণ। কৰ’নাৰ সংক্ৰমণ ৰোধৰ বাবে অতি প্ৰয়োজনীয় লকডাউনে আন বহু সমস্যাৰ সৃষ্টি কৰিলেও দেশৰ প্ৰাকৃতিক পৰিৱেশ বহু পৰিমানে পৰিষ্কাৰ কৰি তুলিলে।
বৰ্তমান গংগা-যমুনাৰ পানী যিদৰে নিৰ্মল হৈ পৰিছে সেইদৰে চৰাই চিৰিকটিৰ কলৰৱত পুনৰ বিনন্দীয়া হৈ পৰিছে প্ৰকৃতি। লকডাউনৰ মাজতে জীৱকূলে বহু স্বস্তি বিচাৰি পাইছে।
অৱশ্যে, কেবল ভাৰতৰ ক্ষেত্ৰতেই যে এনে হৈছে সেইটো নহয়, বিশ্বৰ আন আন বহু দেশতো প্ৰদূষণৰ মাত্ৰা হ্ৰাস পাইছে।
তাৎপৰ্যপূৰ্ণভাৱে এইক্ষেত্ৰত চীনত বিশেষ পৰিৱৰ্তন হোৱা নাই। IQAirৰ নতুন সমীক্ষা অনুসৰি বিশ্বৰ আটাইতকৈ প্ৰদূষিত ২০খন চহৰৰ ভিতৰত আছে চীনৰ ৭খন চহৰ।