যোৱা ৬ জানুৱাৰিত আমেৰিকা যুক্তৰাষ্ট্ৰৰ কেপিটল হিলত হিংসাত্মক আক্ৰমণক উচটনি দিয়াৰ আঁৰৰ ৰহস্য উদ্ঘাটনৰ উদ্দেশ্যে ৯/১১ৰ সন্ত্ৰাসবাদী আক্ৰমণৰ ঘটনাৰ সময়ত গঠন কৰা তদন্ত আয়োগৰ দৰে এখন স্বতন্ত্ৰ আয়োগ গঠনৰ কথা সদৰী কৰিছে কংগ্ৰেছৰ নিম্ন সদনৰ প্ৰতিনিধি পৰিষদৰ অধ্যক্ষ নেন্সি পেলচিয়ে।
আমেৰিকা যুক্তৰাষ্ট্ৰৰ ছিনেটৰ বিচাৰত দলীয় সহানুভুতিৰ বাবে ডোনাল্ড ট্ৰাম্পে সকাহ পালেও এই আক্ৰমণৰ ঘটনাত সমৰ্থকসকলক উচটনি দিয়াৰ অভিযোগৰ পৰা মুক্ত হ’ব পৰা নাই।
অধ্যক্ষৰ বক্তৱ্য অনুসৰি গঠন হ’বলগীয়া আয়োগে বিশদ অনুসন্ধান তথা তদন্ত কৰিব। আগৰে পৰা ভাবুকি থকা সত্ত্বেও নিৰাপত্তা ব্যৱস্থা কিয় ইমান দুৰ্বল আছিল তথা আক্ৰমণকাৰীসকলে ক’ৰ পৰা কেপিটল হিলত এনেকৈ ভয়ংকৰ আক্ৰমণ তথা হিংসাত্মক কাৰ্য চলোৱাৰ সাহস পালে সেই সকলোবোৰ আয়োগে সন্ধান চলাব।
সোমবাৰে প্ৰতিনিধি পৰিষদৰ সকলো ডেম’ক্ৰেট সদস্যসকলৰ ওচৰত প্ৰেৰণ কৰা পত্ৰত পেলচিয়ে উল্লেখ কৰিছে যে এই আয়োগ গঠনৰ জৰিয়তে পৰৱৰ্তী কাৰ্যব্যৱস্থা আৰম্ভ হ’ব।
কেপিটল হিলৰ আক্ৰমণত উচটনি দিয়াক লৈ উদ্ভৱ হোৱা বহু প্ৰশ্নৰ উত্তৰ পোৱা যাব বুলি কোৱা হৈছে।
অধ্যক্ষৰ পত্ৰত আৰু উল্লেখ কৰা হৈছে যে কেপিটল হিলৰ নিৰাপত্তা তথা কংগ্ৰেছসদস্যসকলৰ নিৰাপত্তা উপযুক্ত পদক্ষেপ গ্ৰহণৰ বাবে অতিৰিক্ত বাজেট অনুমোদনৰ প্ৰয়োজন আছে।
আমেৰিকাৰ ছিনেটত ট্ৰাম্পৰ দ্বিতীয় পৰ্যায়ৰ বিচাৰ সম্পন্ন হোৱাৰ দুদিন পাছতে অধ্যক্ষৰ এনে পত্ৰই স্বাভাৱিকতেই আৰু নতুন দিশৰ উন্মোচন ঘটোৱাৰ সম্ভাৱনা বৃদ্ধি কৰিছে।
