উত্তৰ-পূব শিশু গ্ৰন্থমেলা : ছাত্ৰ-ছাত্ৰীৰ উৎসাহজনক সহাঁৰিয়ে হাঁহি বিৰিঙাইছে গ্ৰন্থ বিক্ৰেতাক
নগাঁও চহৰৰ ঐতিহ্যমণ্ডিত কলঙৰ বাকৰি নেহেৰুৱালিত অনুষ্ঠিত হৈ থকা উত্তৰ পূৱ শিশু গ্ৰন্থমেলাৰ শনিবাৰে চতুৰ্থ দিনা গ্ৰন্থপ্ৰেমীৰ উৎসাহজনক সহাঁৰিয়ে হাঁহি বিৰিঙাইছে গ্ৰন্থ বিক্ৰেতা সকলক। বিশেষকৈ অসম বন্ধৰ কালছোৱাত কোনোধৰণৰ প্ৰভাৱ নপৰা এই শিশু গ্ৰন্থমেলাত পুৱাৰে পৰা বিদ্যালয়-মহাবিদ্যালয়ৰ ছাত্ৰ-ছাত্ৰীৰ সোঁত বয়। ছাত্ৰ-ছাত্ৰী সকলে গ্ৰন্থমেলাৰ বিপনীত ভিৰ কৰা পৰিলক্ষিত হোৱাৰ লগতে নিজৰ প্ৰিয় গ্ৰন্থখন বিচাৰি গ্ৰন্থমেলাস্থলী চলাথ কৰে।
উল্লেখ্য যে, উত্তৰ পূব শিশু গ্ৰন্থমেলা সমিতিৰ উদ্যোগত আৰু নগাঁও জিলা প্ৰশাসনৰ সহযোগত যোৱা ৩১ অক্টোবৰৰ পৰা ৮ দিনীয়া কাৰ্যসূচীৰে আৰম্ভ হোৱা উত্তৰ পূব শিশু গ্ৰন্থমেলাৰ শনিবাৰে পুৱা ১০ বজাৰ পৰা সদৌ অসম গ্ৰাম্য পুথিভঁৰাল সন্থাৰ উদ্যোগত ‘শিশুৰ সুৰক্ষা, যতন আৰু শিশু শ্ৰমিক প্ৰতিৰোধ’ শীৰ্ষক বিষয়ত এক আলোচনা চক্ৰ অনুষ্ঠিত হয়।
সদৌ অসম গ্ৰাম্য পুথিভঁৰাল সন্থাৰ সভাপতি প্ৰতাপ হাজৰিকাৰ সঞ্চালনাত আৰু সন্থাৰ প্ৰধান সম্পাদক বল্লদেৱ শৰ্মাই আদৰণি ভাষণ আগবঢ়োৱা আলোচনা চক্ৰখনিত অৱসৰপ্ৰাপ্ত সমাজ কল্যাণ বিষয়া প্ৰমীলা কন্দলী, অৱসৰপ্ৰাপ্ত শিক্ষা বিষয়া প্ৰেমেশ্বৰ দাস, জ্যেষ্ঠ সাংবাদিক ৰাজেন বৰকাকতি, নগাঁও জিলা সাহিত্য সভাৰ প্ৰাক্তন সভাপতি ডাঃ দিলীপ বৰুৱা, শিশু সুৰক্ষা বিষয়া পল্লৱী শইকীয়া আদিয়ে অংশগ্ৰহণ কৰি বক্তব্য ৰাখে।
অসম সাহিত্য সভাৰ প্ৰধান সম্পাদক পদুম ৰাজখোৱাই উদ্বোধন কৰা আলোচনাত চক্ৰখনিৰ আঁত ধৰে খগেন চন্দ্ৰ নাথে। এই আলোচনা চক্ৰখনিৰ পিছতেই নগাঁৱৰ আগশাৰী শিক্ষানুষ্ঠান ৰামানুজন কনিষ্ঠ মহাবিদ্যালয়ৰ উদ্যোগত ‘সৰ্ব ভাৰতীয় প্ৰেক্ষাপটত শ্ৰীমন্ত শংকৰদেৱ’ শীৰ্ষক আলোচনাচক্ৰ অনুষ্ঠিত হয়। ৰামানুজন কনিষ্ঠ মহাবিদ্যালয় অধ্যক্ষ দিলীপ বৰাৰ সঞ্চালনাত অনুষ্ঠিত এই আলোচনা চক্ৰখনিত সমল ব্যক্তি হিচাপে শিক্ষাবিদ তথা শংকৰী কলা কৃষ্টিৰ গৱেষক সঞ্জীৱ কুমাৰ বৰকাকতিয়ে আংশগ্ৰহণ কৰে।
বিয়লি মেলডি হোম সংগীত বিদ্যালয়ৰ দ্বাৰা সাংস্কৃতিক অনুষ্ঠান পৰিবেশন কৰা হয়। সন্ধিয়া নগাঁৱৰ আন এখন অগ্ৰণী শিক্ষানুষ্ঠান সন্দিপনী বিদ্যামন্দিৰৰ ছাত্ৰ-ছাত্ৰী সকলে সাংস্কৃতিক অনুষ্ঠান পৰিবেশন কৰে।
আনহাতে, গ্ৰন্থমেলাস্থলিত শুকুৰবাৰে অনুষ্ঠিত এক অনুষ্ঠানত অংশগ্ৰহণ কৰি অনুৰাধাৰ দেশ খ্যাত বিশিষ্ট সাহিত্যিক, সাংবাদিক ফণীন্দ্ৰ কুমাৰ দেৱ চৌধুৰীয়ে কয়- ‘বন্দুক ধাৰীতকৈ তেওঁলোকক বিষাক্ত চিন্তা সোমোৱাই দিয়া সকলো কম দোষী নহয়। এতিয়া অসমীয়া জাতি সংকটৰ আৱৰ্তত সোমাই পৰিছে। এতিয়া আমি সকলোৱে সু-শৃংখলিতভাৱে আগবাঢ়িলেহে জাতিটোৰ সংকট দূৰ কৰিব পৰা যাব।