মণিপুৰত পুনৰ হিংসাত্মক পৰিস্থিতি আৰু ৰাজ্য চৰকাৰে নিয়ন্ত্ৰণত ব্যৰ্থ হোৱা বুলি অভিযোগ উত্থাপন হোৱাৰ পাছতে ৰাজ্যৰ বিজেপি নেতৃত্বাধীন চৰকাৰৰ পৰা প্ৰত্যাহাৰ কৰাৰ কথা ঘোষণা কৰিছে নেশ্যনেল পিপলছ পাৰ্টিয়ে।
মেঘালয়ৰ মুখ্যমন্ত্ৰী নেতৃত্বাধীন এন পি পিয়ে ৰাষ্ট্ৰীয় বিজেপিৰ সভাপতি জে পি নাড্ডালৈ লিখা এখন পত্ৰত উল্লেখ কৰে যে তেওঁৰ দলে বিজেপি নেতৃত্বাধীন মণিপুৰ চৰকাৰৰ সমৰ্থন প্ৰত্যাহাৰ কৰিব।
মুখ্যমন্ত্ৰী এন বীৰেণ সিঙে পৰিস্থিতি নিয়ন্ত্ৰণত ব্যৰ্থ হোৱাৰ পিছত প্ৰত্যাহাৰৰ সিদ্ধান্ত লোৱা বুলিও দাবী কৰে এনপিপিয়ে।
উল্লেখ্য যে মণিপুৰত এনপিপিৰ সাতজন বিধায়ক আছে।
কিন্তু ৰাজ্যত এতিয়াও বিজেপিৰ সংখ্যাগৰিষ্ঠ আসন আছে আৰু এনপিপিৰ পৰা সমৰ্থন প্ৰত্যাহাৰ কৰিলেও চৰকাৰৰ ওপৰত কোনো প্ৰভাৱ নপৰে।
এনপিপিয়ে নড্ডালৈ লিখা পত্ৰখনত উল্লেখ কৰিছে যে এন বীৰেণ সিঙৰ চৰকাৰে মণিপুৰৰ সংকট নিয়ন্ত্ৰণ কৰাত ব্যৰ্থ হৈছে।
উল্লেখযোগ্য যে ৰাজ্যত পুনৰ হিংসাত্মক পৰিস্থিতিৰ সৃষ্টি হোৱাৰ পাছত শনিবাৰে মণিপুৰ চৰকাৰে ৰাজ্যৰ ৭খন জিলাত দুদিনীয়া ইণ্টাৰনেট ব্লেকআউটৰ ব্যৱস্থা কৰে৷
এই পদক্ষেপৰ লক্ষ্য আছিল বৰ্ধিত উত্তেজনা আৰু নাগৰিক সমাজৰ সংগঠনসমূহৰ চলি থকা প্ৰতিবাদ দমন কৰা।
মণিপুৰৰ মুখ্য সচিব বিনীত যোশীয়ে জাৰি কৰা এক অধিসূচনাত আক্ৰান্ত জিলা ইম্ফল পশ্চিম, ইম্ফল পূব, বিষ্ণুপুৰ, থৌবাল, কাকচিং, কাংপকপি, আৰু চুৰাচান্দপুৰৰ বিষয়ে বিতংভাৱে উল্লেখ কৰা হৈছে।
এই নিলম্বনে মোবাইল ডাটা, ভিএছএটি, ব্ৰডবেণ্ড, ভিপিএনকে ধৰি বিভিন্ন ইণ্টাৰনেট সেৱা সামৰি লৈছে।
অৱশ্যে চৰকাৰী কাৰ্যালয়সমূহে লিজড লাইন আৰু এফ টি টি এইচ সংযোগৰ বাবে এই নিষেধাজ্ঞাৰ পৰা ৰেহাই পাব।
