অৰুণাচল প্ৰদেশৰ লংডিং জিলাৰ পৰা অপহৰণ কৰি নিয়াৰ ১২ দিনৰ পিছত ম্যানমাৰস্থিত উগ্ৰপন্থী সংগঠন এন এছ চি এন (কে-ৱাই)য়ে অসম আৰু বিহাৰৰ দুজন নিৰ্মাণ কৰ্মীক মুকলি কৰি দিছে।
লংডিং আৰক্ষীয়ে প্ৰকাশ কৰা মতে যে এন এছ চি এন-কেৰ য়ুং অং গোটটোৱে শ্ৰমিক দুজনক অপহৰণ কৰি নিছিল। তেওঁলোকক অৰুণাচল -অসম সীমান্তৰ অপহৰণ কৰা হৈছিল।
লংডিং জিলাৰ আৰক্ষী অধীক্ষক বিক্ৰম হৰিমোহন মীনাই কয় যে দুয়োকে আৰক্ষীৰ অহৰহ চেষ্টাৰ অন্তত উদ্ধাৰ কৰিব পৰা গৈছে। তেওঁ কয় যে দুয়োজন শ্ৰমিক বৰ্তমান সুস্থ হৈ আছে আৰু তেওঁলোকৰ চিকিৎসা পৰীক্ষা কৰোৱা হৈছে।
আৰক্ষী বিষয়াসকলে কয় যে লংডিং জিলাৰ পুমাও-লাংখোৱাৰ এটা পথ নিৰ্মাণ প্ৰকল্পত নিয়োজিত হৈ আছিল বানফুয়া ৱাংপান, হীৰেন কোচ আৰু ৰামাশিস মহাতো নামৰ শ্ৰমিক কেইজন ।
সেই স্থানৰ পৰাই উগ্ৰপন্থীয়ে তেওঁলোকক ৩১ জানুৱাৰীত অপহৰণ কৰিছিল৷
তিনিজন বন্দীৰ ভিতৰৰে বানফুয়া ৱাংপানক পিছদিনা মুকলি কৰি দিয়া হৈছিল আৰু আন দুজনক এন এছ চি এন (কে-ৱাইএ)ৰ গোপন শিবিৰত বন্দী কৰি ৰখা হৈছিল।
উগ্ৰপন্থীয়ে মুক্তিপণ হিচাপে ৪ কোটি টকা দাবী কৰিছিল বুলি জানিব পৰা গৈছে।
অৱশ্যে মুক্তিপণ আদায় দিয়া হৈছে নে নাই সেয়া জানিব পৰা হোৱা নাই।
এনএছচিএন (কে-ৱাই)ৰ কেডাৰসকলে যোৱা কেইবামাহ ধৰি ব্যৱসায়ীসকলৰ পৰা ধন সংগ্ৰহ কৰি আছে। ইয়াৰ পূৰ্বে উগ্ৰপন্থীয়ে অৰুণাচল প্ৰদেশৰ নিৰ্মাণ কৰ্মীসহ কেইবাজনো লোকক অপহৰণ কৰিছিল। কিন্তু পৰৱৰ্তী সময়ত মুক্তিপণ পোৱাৰ পিছত তেওঁলোকক মুকলি কৰি দিছিল।
