কেন্দ্ৰীয় চৰকাৰে দেশৰ সম্পদ বিক্ৰী কৰাৰ বিৰুদ্ধে তথা নিবনুৱা সংস্থাপনৰ দাবীত আজি বঙাইগাঁও জিলা এন এছ ইউ আইয়ে জিলা উপায়ুক্ত কাৰ্যালয়ৰ সন্মুখত এক প্ৰতিবাদী ধৰ্ণা কাৰ্যসূচী ৰূপায়ণ কৰে ৷
এন এছ ইউ আইৰ কৰ্মীসকলে জিলা কংগ্ৰেছ কাৰ্যালয় ৰাজীৱ ভৱনৰ পৰা সমদল কৰি গৈ জিলা উপায়ুক্ত কাৰ্যালয়ৰ সন্মুখত উপস্থিত হৈ ধৰ্ণা কাৰ্যসূচী ৰূপায়ণ কৰে ৷
প্ৰতিবাদী ধৰ্ণা কাৰ্যসূচীত অংশগ্ৰহণ কৰা কৰ্মীসকলে নৰেন্দ্ৰ মোদী হুচিয়াৰ ,দেশৰ সম্পদ বিক্ৰী কৰা নচলিব , নিবনুৱাক সংস্থাপন দিয়ক , দেশৰ সম্পদ বিক্ৰী কৰা বন্ধ কৰক, নিবনুৱা সমস্যা সমাধান কৰক, অমিত শ্বাহ গ’বেক আদি বিভিন্ন শ্লোগান দি পৰিৱেশ উত্তাল কৰি তোলে ৷
সংগঠনটোৱে বিজেপি চৰকাৰক নিৰ্বাচনৰ পূৰ্বে দিয়া প্ৰতিশ্ৰুতিসমূহ পূৰণ কৰি নিবনুৱা সমস্যা সমাধান কৰা , মূল্যবৃদ্ধি ৰোধ কৰি সৰ্বসাধাৰণ ৰাইজক সকাহ দিয়াৰ লগতে পুঁজিপতিক সন্তুষ্টি কৰিবলৈ দেশৰ সম্পদ বিক্ৰী কৰা বন্ধ কৰিবলৈ দাবী জনায় ৷
প্ৰতিবাদী কাৰ্যসূচীত এন এছ ইউ আইৰ বঙাইগাঁও জিলা সমিতিৰ সাধাৰণ সম্পাদক জাহাংগীৰ আলমকে ধৰি অন্যান্য বিষয়ববীয়া আৰু কৰ্মীসকল , জিলা কংগ্ৰেছৰ সভাপতি মৃণাল অধিকাৰী , সাধাৰণ সম্পাদকদ্বয় গোকুল কলিতা আৰু হিমাঞ্জন শৰ্মা , জিলা মহিলা কংগ্ৰেছৰ সভানেত্ৰী সাৰদা ৰায় চৌধুৰী , প্ৰদেশ কংগ্ৰেছৰ সম্পাদক জ্যোতিৰ্ময় বৈশ্য আদিও উপস্থিত থাকে ৷
