বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানৰ লগতে পৰ্যটকৰ বাবে ভাল খবৰ। কাজিৰঙাত বৃদ্ধি পাইছে ২০০ এশিঙীয়া গঁড়। চতুৰ্দশ গঁড় গণনাৰ অন্তত এই তথ্য প্ৰকাশ পাইছে।
ৰাষ্ট্ৰীয় উদ্যানখনত ২০১৮ চনৰ ত্ৰয়োদশ গঁড় গণনাৰ সময়ত ২৪১৩ টা গঁড়ৰ অৱস্থিতিৰ তথ্য প্ৰকাশ পাইছিল। এইবাৰ চতুৰ্দশ গণনাত এই সংখ্য ২৬১৩ টালৈ বৃদ্ধি পাইছে।
কাজিৰঙা ৰাষ্ট্ৰীয় উদ্যান ও ব্যাঘ্ৰ সংৰক্ষিত বনাঞ্চল কৰ্তৃপক্ষই যোৱা ২৫ মাৰ্চৰ পৰা ২৮ মাৰ্চ ২০২২ লৈ চতুৰ্দশ গঁড় গণনাৰ কাম সম্পন্ন কৰে৷ ইয়াৰে ৰাষ্ট্ৰীয় উদ্যান এলেকাৰ ৭৬ টা কম্পাৰ্টমেন্টত আৰু বিশ্বনাথ বন্যপ্ৰাণী সংমণ্ডলৰ ৮ টা কম্পাৰ্টমেন্টত গঁড় গণনা কৰা হয়।
এই গণনা কাৰ্যত মুঠ ৬৪ জন গণনাকাৰী, ১২ গৰাকী পৰ্যবেক্ষক, ৪৯ গৰাকী সংবাদকৰ্মীয়ে অংশগ্ৰহণ কৰাৰ উপৰিও ৫০ টা হাতী আৰু মাউটৰ লগতে প্ৰত্যক্ষভাৱে ২৫২ গৰাকী বনকৰ্মীক জড়িত কৰা হয়।
এই চতুৰ্দশ গঁড় গণনাত কাজিৰঙা ৰাষ্ট্ৰীয় উদ্যান ও ব্যাঘ্ৰ সংৰক্ষিত বনাঞ্চলত মুঠ ২৬১০ টা গঁড় পোৱা যায়।
তথ্য অনুসৰি ৭৫০ টা প্ৰাপ্ত বয়স্ক মতা গঁড়, ৯০৩ জনী প্ৰাপ্ত বয়স্ক মাইকী গঁড়, ১৭০টা লিংগ নিৰূপন নোহোৱা প্ৰাপ্ত বয়স্ক গঁড়, ১১৬ টা মতা ডেকেৰুৱা, ১৪৬ জনী মাইকী ডেকেৰুৱা, ১০৩টা লিংগ নিৰূপন নোহোৱা ডেকেৰুৱা গঁড়, ২৭৯ টা চেমনীয়া আৰু ১৪৬ টা পোৱালী গঁড় পোৱা গৈছে।
২০১৮ বৰ্ষৰ তুলনাত ২০২২ বৰ্ষত গঁড়ৰ সংখ্যা বৃদ্ধি হোৱাত কাজিৰঙা ৰাষ্ট্ৰীয় উদ্যানৰ বাবে এক ভাল খবৰ বুলি কব পাৰি। অসম গৌৰৱ এশিঙীয়া গঁড়ৰ বাবে কাজিৰঙা পৃথিৱী বিখ্যাত।
সেয়ে পৰ্যটকৰ আকৰ্ষণৰ কেন্দ্ৰ হিচাপে কাজিৰঙা ৰাষ্ট্ৰীয় উদ্যানত গঁড়ৰ সংখ্যা বৃদ্ধি হোৱাত উদ্যান কৰ্তৃপক্ষই এক আশাৰ বতৰা বুলি অভিহিত কৰিছে।
