এগৰাকী ইঞ্জিনিয়াৰিঙৰ ছাত্ৰীক যৌন নিৰ্যাতনৰ অভিযোগ উঠিছে। ঘটনাৰ স্থান পুনৰ ওড়িশা। হোটেলত ৰাতিৰ আহাৰ গ্ৰহণ কৰিবলৈ নিমন্ত্ৰণ কৰি আনি ছাত্ৰগৰাকীক যৌন নিৰ্যাতন চলোৱাৰ অভিযোগ উত্থাপন হৈছে। এই ঘটনাত গ্ৰেপ্তাৰ হৈছে এজন কংগ্ৰেছৰ ছাত্ৰ সংগঠন এনএছইউআইৰ নেতাক।
জানিব পৰা মতে যুৱকজনৰ ছাত্ৰী গৰাকীৰ সৈতে আগৰে পৰাই চিনাকি আছিল। ছাত্ৰ নেতাজনে হোটেলত ছাত্ৰীগৰাকীক শীতল পানীয় খাবলৈ দিছিল। পানীয়ত কিবা মিহলোৱা বুলি অভিযোগ উত্থাপন কৰে ভুক্তভোগীয়ে। সেৱন কৰাৰ কিছু সময়ৰ পিছতে তেওঁ অসুস্থ হৈ পৰে। অভিযোগ অনুসৰি সেই সময়ত হোটেলখনৰ এটা কোঠাত তেওঁক যৌন নিৰ্যাতন চলোৱা হৈছিল।
পিছত ছাত্ৰীগৰাকীয়ে থানাত এজাহাৰ দাখিল কৰে। অভিযোগৰ ভিত্তিত আৰক্ষীয়ে তদন্ত আৰম্ভ কৰে। দেওবাৰে আৰক্ষীয়ে গ্ৰেপ্তাৰ কৰে অভিযুক্তক। ভুৱনেশ্বৰৰ ডিচিপি জগমোহন মীনাই কয় যে, “দেওবাৰে বিয়লি অভিযুক্তক আদালতত হাজিৰ কৰা হয়। কি হৈছিল সেই বিষয়ে জানিবলৈ তদন্ত চলি আছে।” এই ঘটনাৰ লগত আৰু কোনো লোক জড়িত আছে নেকি তাৰো তদন্ত চলি আছে।
উল্লেখ্য যে যোৱা ১২ জুলাইত ওড়িশা বালাচোৰত কলেজীয়া ছাত্ৰী এগৰাকীয়ে অধ্যক্ষৰ ঘৰৰ সন্মুখত নিজৰ গাত জুই লগাইছিল। অভিযোগ অনুসৰি ছাত্ৰীগৰাকীক একাধিকবাৰ যৌন নিৰ্যাতন চলোৱা হৈছিল। অভিযোগ দাখিল কৰাৰ পিছতো কোনো ন্যায় পোৱা নাছিল। এই ঘটনাক লৈ সমগ্ৰ ওড়িশা উত্তাল হৈ পৰিছিল। বিৰোধীয়ে বিজেপি চৰকাৰকলৈ আঙুলি টোৱাবলৈ আৰম্ভ কৰে।
আনহাতে, যোৱা শনিবাৰে আন এক ঘটনাত এগৰাকী ১৫ বছৰীয়া ছাত্ৰীৰ গাত অগ্নিসংযোগ কৰাৰ অভিযোগ উত্থাপন হৈছে। ঘৰলৈ উভতি অহাৰ পথত ছাত্ৰীগৰাকীক পথত থিয় কৰাই জুই লগাই দিয়াৰ অভিযোগ উঠিছে। তাৰপিছতে এইবাৰ পুনৰ ওড়িছাত ইঞ্জিনিয়াৰিঙৰ ছাত্ৰীৰ যৌন নিৰ্যাতনক লৈ বিতৰ্ক আৰম্ভ হৈছে।
