অইল ইণ্ডিয়া লিমিটেডে বাঘজানৰ তৈলক্ষেত্ৰ বন্ধ কৰিবলৈ প্ৰদূষণ নিয়ন্ত্ৰণ ব’ৰ্ডে দিয়া নিৰ্দেশক প্ৰত্যাহ্বান জনাই গুৱাহাটী উচ্চ ন্যায়ালয়ত এক লেখ আৱেদন দাখিল কৰিব।
প্ৰদূষণ নিয়ন্ত্ৰণ ব’ৰ্ডে যোৱা ১৯ জুনত অইলক উক্ত নিৰ্দেশ দিয়াৰ লগতে বৰ্তমান জ্বলি থকা বাঘজানৰ জুই নুমুওৱা আৰু গেছ নিৰ্গমন বন্ধ কৰাৰ ব্যৱস্থা কৰিবলৈয়ো নিৰ্দেশ দিছিল।
“এতিয়া অইলে প্ৰদূষণ নিয়ন্ত্ৰণ ব’ৰ্ড অসমে দিয়া নিৰ্দেশক প্ৰত্যাহ্বান জনাই সন্মানীয় গুৱাহাটী উচ্চ ন্যায়ালয়ৰ সন্মুখত এক লেখ আৱেদন দাখিল কৰাৰ বাবে ইচ্ছা কৰিছে,” অইলে দেওবাৰে কয়।
পৰিৱেশৰ প্ৰদূষণ কৰি অইলে বলৱৎ থকা আইনৰ ব্যৱস্থা উদাসীনভাৱে উলংঘা কৰা বুলি প্ৰদূষণ নিয়ন্ত্ৰণ ব’ৰ্ডৰ জাননীত কোৱা হৈছিল।
প্ৰদূষণ নিয়ন্ত্ৰণ ব’ৰ্ডৰ ক্ষমতাৰ প্ৰয়োগ কৰি পৰিৱেশ (সুৰক্ষা) আইন, ১৯৮৬, জল (প্ৰদূষণ প্ৰতিৰোধ আৰু নিয়ন্ত্ৰণ) আইন, ১৯৭৪ আৰু বায়ু (প্ৰদূষণ প্ৰতিৰোধ আৰু নিয়ন্ত্ৰণ) আইন, ১৯৮১ৰ প্ৰাসংগিক ব্যৱস্থাৰ অধীনত অইলক এই নিৰ্দেশ দিয়া হৈছে।
ইফালে প্ৰতিবাদৰ মুখত বন্ধ হৈ থকা বাঘজান সকলো উৎপাদনক্ষম তেল আৰু গেছ খাদৰ কাম পুনৰ আৰম্ভ হৈছে।
শনিবাৰে তিনিচুকীয়াৰ উপায়ুক্তৰ কাৰ্য্যালয়ত এক ত্ৰিপাক্ষিক বৈঠকৰ পিছতে ইয়াৰ পুনৰাম্ভ হয়।
কিন্তু বাঘজানৰ বাহিৰৰ ৫টা এলেকাত এতিয়াও প্ৰতিবাদৰ বাবে খনন আৰু ৱৰ্কঅ’ভাৰ কাম বন্ধ আছে।
আনহাতে ভাৰতীয় সেনাৰ তৃতীয় ক’ৰে বাঘজানৰ জুই জ্বলি থকা খাদৰ সমীপত বেইলি দলং নিৰ্মাণৰ কাম ৯০ শতাংশ সম্পূৰ্ণ কৰিছে।
অইলে সদৰী কৰা মতে জ্বলন্ত খাদটোৰ সন্মুখভাগ বন্ধ কৰাৰ বাবে প্ৰস্তুতি চলি আছে।
“১২০০০ কি. লি. ক্ষমতাৰ ৰিজাৰ্ভাৰ খন্দাৰ কাম সম্পূৰ্ণ হৈছে। ডাঙৰি নৈৰ পৰা ৰিজাৰ্ভাৰলৈ ফিলিং লাইন নিৰ্মাণৰ কামো সম্পূৰ্ণ হৈছে,” ই লগতে জানিবলৈ দিয়ে।
ইফালে আশ্ৰয় শিৱিৰৰ পৰা যোৱা ১৮ জুনত অইলৰ চিকিৎসালয়ত ভৰ্তি কৰোৱা লোকজনৰ শনিবাৰে মৃত্যু হৈছে।
লোকজন জ্বৰ, কাঁহ, ভোক কমি যোৱা আৰু গুৰুতৰভাৱে দুৰ্বলতাত ভুগিছিল। অইলে সদৰী কৰা মতে লোকজনে শ্বাসনলীৰ সংক্ৰমণত ভুগিছিল।
