গঁড়ৰ খৰ্গৰ চোৰাং কাৰবাৰৰ সৈতে জড়িত বু ইংতি নামৰ এক কুখ্যাত চোৰাং ব্যৱসায়ীক ১৯ আগষ্টৰ নিশা ডিমাপুৰৰ পৰা আটক কৰা হৈছে।
কাজিৰঙা ৰাষ্ট্ৰীয় উদ্যানৰ সহকাৰী বন সংৰক্ষক অৰুণ বিঘ্নেশ আৰু ঋতুপৱন বৰাৰ নেতৃত্বত যোৱা এক অভিযানকাৰী দলে গোলাঘাট আৰু ডিমাপুৰৰ আৰক্ষীৰ সহযোগত নাগালেণ্ডৰ ডিমাপুৰৰ এটা ভাড়াঘৰৰ পৰা যুৱকজনক কৰায়ত্ব কৰে।
ধৃত বু ইংতি কাজিৰঙাৰ বাগৰি বনাঞ্চলৰ গঁড় হত্যাৰ সৈতে জড়িত বুলি কাজিৰঙাৰ কৰ্তৃপক্ষই জনাইছে।
কাজিৰঙাত গঁড় হত্যা কৰি বু ইংতিয়ে তেওঁৰ সহযোগীৰ সহায়ত গঁড়ৰ খৰ্গ ডিমাপুৰৰ পৰা মণিপুৰলৈ প্ৰেৰণ কৰা বুলি জানিব পৰা গৈছে।
এই সংক্ৰান্তত অধিক তথ্যৰ বাবে বু ইংতিক কাজিৰঙাত জেৰা কৰি আছে অভিযানকাৰী বিষয়াই।
উল্লেখ্য যে বু ইংতিৰ দলৰ আন এক দুধৰ্ষ চোৰাং চিকাৰী বিদ্যা ৰংফাৰক অভিযানকাৰী দলে যোৱা ১৭ আগষ্টৰ নিশা কলিয়াবৰৰ দেওপানী গুবিন গাঁৱৰ পৰা আটক কৰিছিল।
ধৃত বিদ্যা ৰংফাৰৰ পৰা লাভ কৰা তথ্যৰ সহায়তে বু ইংতিক কৰায়ত্ব কৰিবলৈ সক্ষম হয় বুলি অভিযানকাৰী দলটোৱে জনায়।
