ৰাজ্যৰ বিভিন্ন প্ৰান্তত নাগৰিকত্ব সংশোধনী বিধেয়ক বাতিলৰ বাবে বিভিন্ন দল-সংগঠনে দাবী জনাই অহাৰ সমান্তৰালভাৱে আজি মাজুলীতো অসম জাতীয়তাবাদী যুৱ ছাত্ৰ পৰিষদৰ মাজুলী জিলা সমিতেয়ে অৱস্থান ধৰ্মঘট কাৰ্যসূচী ৰূপায়ণ কৰে।
অৱস্থান ধৰ্মঘট কাৰ্যসূচীত সংগঠনটোৰ মাজুলীৰ জিলা সমিতিৰ সভাপতি জগত হাজৰিকা, কেন্দ্ৰীয় প্ৰচাৰ সম্পাদক মুনিন্দ্ৰ ভূঞা, সম্পাদক অলিন হাজৰিকাকে প্ৰমুখ্য কৰি সংগঠনটোৰ আঞ্চলিক সমিতিৰ সদস্য সকলেও অংশ গ্ৰহণ কৰে।
অৱস্থা ধৰ্মঘট কাৰ্যসূচীত অংশ গ্ৰহণ কৰি সংগঠনটোৰ সভাপতি গৰাকীয়ে কয় যে আগন্তক লোকসভা নিৰ্বাচন পাৰ হ’বৰ বাবেই নাগৰিকত্ব বিধেয়কৰ জৰিয়তে ১ কোটি ৯০ লাখ হিন্দু বাংলাদেশীক আমন্ত্ৰই জনাই ভোট বেংক বনাব বিচাৰিছে। যাৰ ফলত অসমীয়া কৃষ্টি-সংস্কৃতিৰ প্ৰতি ভাবুকি আহি পৰিছে।
লগতে তেওঁ যেতিয়ালৈকে নাগৰিকত্ব বিধেয়ক বাতিল নহয় তেতিয়ালৈকে প্ৰতিবাদী কাৰ্যসূচী চলি থাকিব বুলিও উল্লেখ কৰে। আজি ধৰ্মঘট কাৰ্যসূচীত কৃষক মুক্তি সংগ্ৰাম সমিতি আৰু কোঁচ ৰাজবংশী ছাত্ৰ সন্থাইও অংশ গ্ৰহণ কৰে।
