উচ্চতৰ মাধ্যমিকৰ প্ৰথম বৰ্ষৰ অংকৰ পৰীক্ষা হঠাতে কোনো কাৰণ নোহোৱাকৈ পিছুৱাই দিছে পৰীক্ষা নিয়ন্ত্ৰকে৷ শেহতীয়াকৈ গম পোৱা মতে, বৰপেটা জিলাৰ নৱম শ্ৰেণীৰ অংকৰ পৰীক্ষাৰ প্ৰশ্নকাকত আগতীয়াকৈ প্ৰকাশ হৈছে৷ ছাত্ৰ-ছাত্ৰীৰ ভৱিষ্যতক লৈ চৰকাৰে এই ধৰণৰ হেতালি খেলিছে কিয়?
এই প্ৰশ্ন অসম প্ৰদেশ কংগ্ৰেছৰ মাননীয় সভাপতি ভূপেন কুমাৰ বৰাৰ৷ আজি এক প্ৰেছ বিবৃতিত বৰাই কয় যে চৰকাৰখনে ছাত্ৰ-ছাত্ৰীৰ বছৰটোৰ কষ্টৰ ফচলক লৈ ল’ৰা-ধেমালি খেলা কাৰ্য নিন্দনীয়ই নহয়, ই অক্ষমনীয় অপৰাধ৷
ছাত্ৰ-ছাত্ৰীৰ ভৱিষ্যতক লৈ বাৰে বাৰে এনেধৰণৰ হেতালি খেলি অহা কথাটোৱে ছাত্ৰ-ছাত্ৰীক মানসিকভাৱে হাৰাশাস্তি কৰাৰ অভিযোগ উত্থাপন কৰি বৰাই কয় যে মুখ্যমন্ত্ৰী হিমন্ত বিশ্ব শৰ্মাৰ আমোলত অসমৰ ছাত্ৰ-ছাত্ৰীৰ ভৱিষ্যত একেবাৰে সুৰক্ষিত নহয়, বাৰে বাৰে প্ৰশ্নকাকত আগতীয়াকৈ ফাদিল হৈছে৷ নিযুক্তি পৰীক্ষাৰ কাকাতসমূহো আগতীয়াকৈ প্ৰকাশ হৈছে৷
এইখন চৰকাৰে বিদ্যায়তনিক পৰিৱেশ গঢ়াৰ পৰিৱৰ্তে এক হৈ-চৈ আৰু ৰং-ৰহইছৰ পৰিৱেশৰ মাজত শিক্ষাৰ মূল বিষয়কসমূহক পাতল কৰাৰ অভিযোগ আনিছে প্ৰদেশ কংগ্ৰেছৰ সভাপতিগৰাকীয়ে৷ শেহতীয়াকৈ মুখ্যমন্ত্ৰীয়ে মেট্ৰিক পৰীক্ষাৰ সমাজ বিজ্ঞান বিষয়ত ১০ নম্বৰকৈ বঢ়াই দিয়াৰ যি ঘোষণা কৰিছে সেয়াও বিজ্ঞানসন্মত নহয় বুলি বৰাই উল্লেখ কৰে৷ সমগ্ৰ ঘটনাৰ বাবে নৈতিক দায়িত্ব স্বীকাৰ কৰি অসমৰ শিক্ষামন্ত্ৰী ৰণোজ পেগুৱে পদত্যাগ কৰা উচিত বুলিও ভূপেন বৰাই উল্লেখ কৰে৷
