বুধবাৰে (৯ জুলাই) সমগ্ৰ দেশতে সাধাৰণ ধৰ্মঘটৰ আহ্বান দিয়া হৈছে। বেংক, বীমা, ডাক সেৱা, কয়লা খনি, পৰিবহণকে ধৰি বহুকেইটা খণ্ডৰ ২৫ কোটিৰো অধিক কৰ্মীয়ে এই ধৰ্মঘটত অংশগ্ৰহণ কৰিবলৈ গৈ আছে।
কেৱল চহৰ অঞ্চলতে সীমাবদ্ধ নহয়, এই আন্দোলনৰ ঢৌৱে ভাৰতৰ গ্ৰাম্য অঞ্চলকো স্পৰ্শ কৰিছে। কাৰণ, শ্ৰমিক সংগঠনসমূহৰ লগতে কৃষক সংগঠন আৰু কৃষি শ্ৰমিক মৰ্চাইও বন্ধক সমৰ্থন জনাইছে।
দেশৰ দহটা কেন্দ্ৰীয় ট্ৰেড ইউনিয়নৰ যৌথ মঞ্চই ধৰ্মঘটৰ আহ্বান জনাইছে। তেওঁলোকৰ অভিযোগ যে কেন্দ্ৰৰ শ্ৰম নীতি সম্পূৰ্ণৰূপে কৰ্পৰেটমুখী, যিটো শ্ৰমিক, কৃষক আৰু দেশৰ সাৰ্বভৌম স্বাৰ্থৰ বিৰোধী।
বিগত কেইমাহমানৰ পৰা সংগঠনটোৱে এই নীতিৰ বিৰুদ্ধে নিৰন্তৰ প্ৰস্তুতি চলাই আহিছে, যাৰ ফলত এইবাৰ বৃহৎ বন্ধৰ আহ্বান দিয়া হৈছে। তেওঁলোকৰ দাবী যে এই ধৰ্মঘট কেৱল কাম বন্ধ কৰা নহয়, ই এক সৰ্বভাৰতীয় প্ৰতিবাদৰ প্ৰতীক।
বছৰ বছৰ ধৰি শ্ৰমিক সংগঠনসমূহে ১৭টা দাবী কেন্দ্ৰীয় চৰকাৰৰ ওচৰত দাখিল কৰি আহিছে। কিন্তু চৰকাৰে সেই দাবীবোৰক গুৰুত্ব নিদিয়াকৈ চাৰিটা নতুন শ্ৰম সংহিতা গৃহীত কৰা বুলি অভিযোগ উঠিছে। যিবোৰ বাস্তৱিকতে শ্ৰমিকৰ অধিকাৰ হ্ৰাস কৰাৰ বাবে প্ৰস্তুত কৰা হৈছে। এই সংহিতাসমূহে ট্ৰেড ইউনিয়নৰ সংগঠিত প্ৰতিবাদ, ধৰ্মঘটৰ অধিকাৰ, শ্ৰমিকৰ সুৰক্ষাৰ কাঠামো দুৰ্বল কৰি তুলিছে বুলি অভিযোগ উঠিছে।
ইয়াৰ উপৰিও কৰ্মৰ সময় বৃদ্ধি কৰা হৈছে, মজুৰিৰ গাঁথনিৰ স্বচ্ছতা হ্ৰাস কৰা হৈছে, কৰ্পৰেট কোম্পানীসমূহক আইনী দায়বদ্ধতাৰ বাহিৰত ৰখা হৈছে, যাক শ্ৰমিক সংস্থাসমূহে ‘শোষণৰ বৈধকৰণ’ বুলি অভিহিত কৰিছে।
কেৱল শ্ৰমিকেই নহয়, কৃষক সংগঠনসমূহো এই আন্দোলনৰ পক্ষত আছে। সংযুক্ত কৃষক মৰ্চাই কয় যে চৰকাৰে যিদৰে কৃষি আৰু শ্ৰমিকক কৰ্পৰেটক গতাই দিবলৈ চেষ্টা কৰিছে সেয়া ভাৰতৰ আৰ্থ-সামাজিক গাঁথনিৰ বাবে এক বিপদজনক সংকেত। ফলত এই ধৰ্মঘটৰ প্ৰভাৱ নগৰ আৰু উদ্যোগিক অঞ্চলৰ বাহিৰেও গাঁও আৰু কৃষিভূমিত পৰিব।
বিগত বছৰবোৰত ভাৰতত ২৬ নৱেম্বৰ, ২০২০, ২৮-২৯ মাৰ্চ, ২০২২, আৰু ১৬ ফেব্ৰুৱাৰী, ২০২৪ তাৰিখে দেশজুৰি ধৰ্মঘট দেখা গৈছিল। কিন্তু এইবাৰ প্ৰস্তুতি আৰু অংশগ্ৰহণৰ সম্ভাৱ্য পৰিসৰ বহুত বেছি, বহুত বেছি সাংগঠনিকভাৱে সুসংগঠিত। প্ৰশাসনে জৰুৰীকালীন সেৱা চলাই থাকিবলৈ চেষ্টা কৰিলেও এই আন্দোলনে কিমান প্ৰভাৱ পেলাব সেয়া নিৰ্ভৰ কৰে এই বৃহৎ ধৰ্মঘটৰ বাস্তৱতাৰ ওপৰত।
এই ধৰ্মঘট কেৱল নায্য মজুৰিৰ যুঁজ নহয়, ই এক ডাঙৰ ৰাজনৈতিক বাৰ্তা, যেন দেশৰ শ্ৰমিক শ্ৰেণী আৰু কৃষক সমাজে কৰ্পৰেট নিয়ন্ত্ৰণৰ বিৰুদ্ধে ৰাজপথলৈ ওলাই আহিছে।
