ভাৰতীয় সেনাৰ সূত্ৰ অনুসৰি পাকিস্তানী সেনাই পুনৰ যুদ্ধবিৰতি চুক্তি ভংগ কৰি জম্মু-কাশ্মীৰৰ পুঞ্চত নিয়ন্ত্ৰণৰেখা পাৰ হৈ ভাৰতত গুলী চালনা কৰে। বুধবাৰে ভাৰতীয় সেনাৰ এক বিবৃতিত কোৱা হৈছে যে মঙলবাৰে পাকিস্তানী সেনাই নিয়ন্ত্ৰণৰেখা পাৰ হৈ ভাৰতত সোমাই কৃষ্ণঘাটি সেক্টৰত মাইন বিস্ফোৰণ ঘটায় আৰু বিনা কাৰণত ধাৰাসাৰ গুলী চলায়। ভাৰতীয় সেনাইও প্ৰত্যাঘাত কৰিছে। এতিয়া পৰিস্থিতি নিয়ন্ত্ৰণত আছে বুলি সদৰী কৰিছে।
২০২১ৰ ২৫ ফেব্ৰুৱাৰীত ভাৰত আৰু পাকিস্তানে যুদ্ধবিৰতি চুক্তি নতুনকৈ কৰাৰ পিছত নিয়ন্ত্ৰণৰেখাত এনে ঘটনা হ্ৰাস পাইছিল। কিন্তু ২০২৫ বৰ্ষৰ ফেব্ৰুৱাৰীৰ পৰা নিয়ন্ত্ৰণৰেখাৰ কাষত বিভিন্ন আক্ৰমণৰ ঘটনা বাঢ়িছে। ফেব্ৰুৱাৰীত আইইডি বিস্ফোৰণত দুজন সেনা জোৱানৰ মৃত্যু হৈছিল আৰু এজন আহত হৈছিল। ইয়াৰ পূৰ্বে পৱাৰা জিলাত তলাচীৰ সময়ত কাৰনা এলেকাৰ পৰা বহুপৰিমাণৰ অস্ত্ৰ উদ্ধাৰ হৈছিল। ৪-৫ ফেব্ৰুৱাৰীৰ ভিতৰত সাতজন পাকিস্তানী অনুপ্ৰৱেশকাৰীয়ে কৃষ্ণঘাটি সেক্টৰৰ মাজেৰে পুঞ্চত সোমাবলৈ চেষ্টা কৰিছিল। তেওঁলোকে ভাৰতীয় জোৱানৰ ওপৰত গুলী চলোৱাত দুয়োপক্ষৰ গুলীয়াগুলীত সাতজনৰ মৃত্যু হয়। সেনাৰ সূত্ৰ অনুসৰি, নিহতৰ ভিতৰত দুই-তিনিজন পাকিস্তানী সেনা আৰু বাকীসকল অল বদৰ জঙ্গীগোষ্ঠীৰ সদস্য আছিল।
ভাৰতীয় সেনাৰ লেফটেনেণ্ট জেনেৰেল নৱীন সচদেৱে জনোৱা মতে, শেহতীয়াকৈ নিয়ন্ত্ৰণৰেখাৰ কাষৰ জিলাত সন্দেহজনক কাম-কাজ বাঢ়িছে। সেয়ে এলেকাত নিৰাপত্তা ব্যৱস্থা বঢ়োৱা হৈছে বুলি সদৰী কৰে।
