পাকিস্তানী চোৰাংচোৱা সংস্থা আই এছ আইৰ এজেন্টে এগৰাকী ভাৰতীয় নাগৰিকক হানি ট্ৰেপিঙৰ জালত পেলায় ভাৰতৰ বহু স্পৰ্শকাতৰ ফ’টো আৰু গোপন তথ্য যোগান ধৰিবলৈ বাধ্য কৰোৱা এক চাঞ্চল্যকৰ কাণ্ড পোহৰলৈ আহিছে।
ইতিমধ্যে লক্ষ্মৌস্থিত ভাৰতীয় সেনাৰ গুপ্তচৰ শাখা আৰু উত্তৰ প্ৰদেশৰ দুৰ্নীতি নিৰ্বাৰক(Anti-corruption) শাখাই যৌথ প্ৰচেষ্টাত পাকিস্তানী আই এছ আইৰ এই জাল ব্যৰ্থ কৰিছে।
উত্তৰ প্ৰদেশৰ গোৰক্ষপুৰৰ মহম্মদ হানিফ(নামটো সলনি কৰা হৈছে) নামৰ লোকজনে পাকিস্তানৰ কৰাচীত আত্মীয় ঘৰত ফুৰিবলৈ গৈ আই এছ আইৰ গোপন জালত ভৰি দিয়ে।
ঘটনাৰ বিৱৰণী অনুসৰি মহম্মদ হানিফে কৰাচীত আত্মীয়ৰ ঘৰত থাকোতে ভিছা পৰীক্ষাৰ কৰিবলৈ বুলি দুজন লোক গৈছিল।
ইয়াৰ পৰাই আৰম্ভ হয় মহম্মদ হানিফক কৰা হানি ট্ৰেপিঙৰ পৰ্ব।
ইয়াৰ পিছতে মহম্মদক কৰাচীৰ এখন পতিতলায়লৈ লৈ যোৱা হয় আৰু হানিফ পতিতাৰ সৈতে যৌন কৰ্মত প্ৰবৃত্ত হোৱাৰ লগে লগে তেওঁৰ ফ’টো তোলা হয়।
হানিফে কৰাচীৰ পৰা গোৰক্ষপুৰলৈ উভতি অহাৰ পিছতে যৌন কৰ্মত প্ৰবৃত্ত হৈ থকা ফ’টোবোৰ চ’ছিয়েল মিডিয়াৰ জৰিয়তে ভাইৰেল কৰাৰ ভাবুকি প্ৰদান কৰি আই এছ আইৰ এজেন্টে উত্তৰ প্ৰদেশ বিভিন্ন স্পৰ্শকাতৰ এলেকাৰ ফ’টো প্ৰেৰণ কৰিবলৈ বাধ্য কৰে হানিফক।
হানিফক গৌৰক্ষপুৰৰ সেনা ছাউনী, ৰে’লৱে ষ্টেচন, বায়ু সেনা বাহিনীৰ ছাউনী আদি স্থানৰ স্পৰ্শকাতৰ ফ’টো প্ৰেৰণ কৰিবলৈ বাধ্য কৰাৰ লগতে আই এছ আইয়ে ভাৰতীয় সেনা বাহিনীৰ হোৱাটছএপ গ্ৰুপত হানিফক অন্তভুৰ্ক্ত হ’বলৈ নিৰ্দেশ দিয়ে।
ইফালে সেনাৰ বিশেষ সূত্ৰই দাবী কৰাৰ মতে যোৱা ৫ আগষ্টৰ ৰাম মন্দিৰৰ ভূমি পূজনৰ দিনা গোৰক্ষপুৰত আক্ৰমণ কৰাৰ এক ব্লুপ্ৰিণ্ট তৈয়াৰ কৰিছিল পাকিস্তানী চোৰাংচোৱা সংস্থাটোৱে।
কিন্তু ইয়াৰ পূৰ্বে জন্মু আৰু কাশ্মীৰস্থিত ভাৰতীয় সেনা বাহিনীৰ চোৰাংচোৱা শাখাই উত্তৰ প্ৰদেশৰ গোৰক্ষপুৰৰ এজন লোকৰ সৈতে এটা পাকিস্তানী নম্বৰৰ যোগযোগৰ তথ্য লাভ কৰে।
জন্মু আৰু কাশ্মীৰস্থিত ভাৰতীয় সেনাৰ চোৰাংচোৱা শাখাই লগে লগে লক্ষ্মৌস্থিত ভাৰতীয় সেনাৰ চোৰাংচোৱা শাখাক এই কথা অৱগত কৰে।
আৰু সেনাৰ চোৰাংচোৱাৰ শাখাই উত্তৰ প্ৰদেশৰ দুৰ্নীতি নিৰ্বাৰক শাখাক এই বিষয়ে জনায়।
লক্ষ্ণৌস্থিত ভাৰতীয় সেনাৰ চোৰাংচোৱা শাখা আৰু উত্তৰ প্ৰদেশ দুৰ্নীতি নিৰ্বাৰক শাখাৰ যৌথ অভিযানত অৱশেষত পাকিস্তানী গুপ্তচৰ সংস্থা আই এছ আইৰ এই জাল ব্যৰ্থ কৰা হয়।
