শ্ৰীলংকা হোৱাৰ দিশে পাকিস্তান, ইন্ধনৰ অভাৱত আন্ধাৰে চানিছে সমগ্ৰ দেশ
পাকিস্তানৰ অৰ্থনীতি এতিয়া শ্ৰীলংকাৰ দৰেই দেউলীয়া হোৱাৰ পথত। দেশ খনত এতিয়া দেখা দিছে ইন্ধনৰ তীব্ৰ নাটনিয়ে।দেশত মূল্যবৃদ্ধিৰ হাৰ ১৩.৮ শতাংশত উপনীত হৈছে। যাৰ ফলত খাদ্য সংকটো এক শোচনীয় অৱস্থাত উপনীত হৈছে।
পাকিস্তানত বিদ্যুৎ সংকট অধিক তীব্ৰ হৈ উঠিছে। ইন্ধনৰ অভাৱৰ বাবে, দেশত বিদ্যুৎ উৎপাদন সঠিক ভাবে হোৱা নাই। ফলস্বৰূপে, ব্লেক আউটৰ ম্যাদ দীঘলীয়া হৈ আহিছে। এতিয়া বিদ্যুৎ কৰ্তনৰ সময়সীমা ১২ ঘণ্টালৈ বৃদ্ধি পাইছে।
এক কথাত শ্ৰীলংকাৰ দৰেই পৰিস্থিতি হৈছে পাকিস্তানত।ইফালে আশংকা বৃদ্ধি কৰি পাকিস্তানী প্ৰশাসনে কৈছে যে ব্লেকআউট সময় আগন্তুক দিনত সম্প্ৰসাৰিত কৰা হ’ব পাৰে।
কিছুমান শীততাপ নিয়ন্ত্ৰণ সঁজুলিৰ ব্যৱহাৰ সীমিত কৰা হৈছে। প্ৰাকৃতিক গেছৰ মূল্য অধিক ব্যয়বহুল হৈ পৰিছে। দেশৰ অৰ্থনীতিৰ ক্ৰমে পতন ঘটিছে। বৈদেশিক মুদ্ৰাৰ ভাণ্ডাৰ প্ৰায় শূন্য। শ্ৰীলংকাৰ পিছত এতিয়া ক্ৰমে দেউলীয়া হোৱাৰ দিশে চুবুৰীয়া ৰাষ্ট্ৰ পাকিস্তান। গতিকে পৰিস্থিতি চম্ভালিবলৈ পাকিস্তানে সকলো ‘অপ্ৰয়োজনীয়’ বিলাসী সামগ্ৰীৰ আমদানি নিষিদ্ধ কৰিছে।
কৰ’না মহামাৰী, অপব্যৱস্থা আৰু ঋণৰ বোজাত পাকিস্তানৰ অৰ্থনীতি কাৰ্যতঃ ধ্বংস হৈ পৰিছে। সামগ্ৰীৰ উৎপাদন আৰু ৰপ্তানিৰ ক্ষেত্ৰত যথেষ্ট ক্ষতিৰ সন্মূখীন হৈছে দেশখন। ফলত বৈদেশিক মুদ্ৰাৰ মজুত প্ৰায় শূন্যৰ দিশে ধাৱমান হৈছে।
ফলত খাদ্যৰ পৰা আৰম্ভ কৰি ঔষধৰ দাম অস্বাভাবিক হাৰত বৃদ্ধি পাইছে। এনে পৰিস্থিতিত প্ৰধানমন্ত্ৰী শ্বাহবাজ শ্বৰীফৰ চৰকাৰে খাদ্য আৰু ঔষধৰ দৰে অত্যাৱশ্যকীয় সামগ্ৰীৰ যোগান নিয়মীয়া কৰি ৰাখিবলৈ সকলো ‘অপ্ৰয়োজনীয়’ বিলাসী সামগ্ৰীৰ আমদানিত নিষেধাজ্ঞা আৰোপ কৰিছে। এই কথা ঘোষণা কৰিছিল পাকিস্তানৰ তথ্য মন্ত্ৰী মৰিয়াম ঔৰংজেৱে।